Java e 14-të e Superiores mbyllet sot me dy sfida mjaft interesante ku padiskutim spikat i ashtuquajturi derbi mes Kamzës dhe Kukësit për vetë numrin e lartë të kuksianëve që jetojnë në këtë zonë të madhe të periferisë së Tiranës.
Në një stadium të tejmbushur sot në orën 14:00 parashikohet një duel i nxehtë për vetë pozitën e dy skuadrave në tabelën e klasifikimit. Kamza tashmë ka në stol trajnerin që nxori kampion Kukësin para dy sezonesh, Ernest Gjokën, i cili ka marrë përsipër misionin e vështirë për të shpëtuar blutë nga periferia e kryeqytetit.
Vendasit kanë nevojë urgjente por e njëjta situatë është edhe te Kukësi i Armando Cungut. Verilindorët me vetëm 2 pikë të grumbulluara në 3 javët e fundit kanë humbur shumë terren ndaj kreut dhe sot do të kënaqeshin vetëm me 3 pikët.
Një sfidë e bukur për t’u parë është edhe ajo mes Laçit e Kastriotit me kurbinasit që janë dukshëm të favorizuar për të marrë tre pikët, edhe pse krutanët nuk duhen nënvlerësuar pasi u janë rikthyer rezultateve pozitive dhe duan pikët e mbijetesës.
