Kryetari i Bashkisë së Tiranës, Erion Veliaj lajmëroi hapjen e konkursit për ndërtimin e qendrës më të madhe të ekselencës për fëmijët e spektrit autik dhe sindromës doën.
“Ashtu siç bëmë me Piramidën, pronën më të shtrenjtë në Tiranë, ia kushtuam fëmijëve me kurset falas për kodim, duam që pronën te “Pëllumbat”, tek Ambasada Amerikane, ta kthejmë në qendrën më të madhe të ekselencës për shërbimet e fëmijëve me spektrin autik edhe sindromës down”, tha Veliaj.
Veliaj u shpreh se kjo qendër është një nga nevojat më të mëdha të qytetit si ndihmë për fëmijët e sidomos prindërit.
“Një qytet i mirë, ka vend për të gjithë, ka zemër për të gjithë. Nuk jemi një qytet nga më të pasurit në botë, por gjersa gjen mundësi për të subvencionuar studentët, për të subvencionuar fëmijët që marrin kurse kodimi, për të subvencionuar të moshuarit që marrin një abone falas, duhet të gjejmë dhe i kemi gjetur paratë edhe për fëmijët e spektrit autik dhe sindromës down”, tha Veliaj.
Ai ftoi të gjithë arkitektët që kanë ide për t’u bërë pjesë e konkursit dhe për të ofruar ide sesi kjo hapësirë të kthehet në një qendër ekselence për të gjithë Ballkanin.
