Ledina Mandija, zv.kryeministrja e PD-së ka zhvilluar një takim me Kryeprokurorin Adriatik Llalla ku në fokus të bisedimeve ka qenë lufta ndaj shkeljeve ligjore gjatë fushatës dhe procesit zgjedhor.
Mbi këtë çështje Mandija i ka propozuar Llallës që hetimi i rasteve abuzive në fushatën elektorale dhe zgjedhje të formalizohet përmes një marrëveshjes bashkëpunimi mes Këshillit të Ministrave, Prokurorisë, KQZ-së dhe Komisionerit për Mbikëqyrjen e Shërbimit Civil.
Kësisoj zv.kryeministrja ka kërkuar bashkëpunimin dhe koordinimin e të gjitha këtyre institucioneve për të parandaluar rastet abuzive që mund të jenë shfaqur ose do të shfaqen në të ardhmen e afërt.
Nga ana e tij, kryeprokurori ka mirëpritur propozimin e zonjës Mandia dhe është shprehur se është dakort me formalizimin e një bashkëpunimi ndërinsititucional.
“Gjatë bashkëbisedimit, Zv/Kryeministrja nënvizoi rëndësinë e rolit të organit të Prokurorisë, në hetimin e rasteve të përdorimit të burimeve njerëzore, financiare dhe logjistike të administratës shtetërore, gjatë procesit zgjedhor për vitin 2017. Znj. Mandija i kërkoi Prokurorit të Përgjithshëm në mënyrë specifike që të hetohet në drejtim të rasteve të përdorimit të burimeve të siguruara nga veprimtaritë e paligjshme.”- shkruhet në njoftimin e kryeministrisë./a.m.