Zgjedhjet në Himarë janë komentuar të martën edhe nga Partia Agrare Ambientaliste, subjekt politik ky në opozitë. Nëpërmjet një deklaratë për mediat, PAA nënvizon se në Himarë, humbi procesi, standardi i zgjedhjeve.
“Në Himarë u dëshmua se ne ende nuk bëjmë dot zgjedhje të lira, të drejta dhe të besueshme.”, thuhet në deklaratë.
PAA, referuar disa konkluzioneve të raportit të organizatës KRIIK, tha se listat e zgjedhësve nuk u afishuan as në ambientet me akses të lirë për publikun në Bashki dhe as në ambientet e Qendrave të Votimit, në kundërshtim me ligjin.
Sipas PAA-së, këto parregullsi, dhe të tjera, kanë ndikuar thelbësisht në deformimin e realitetit zgjedhor.
“Ato kanë devijuar votën dhe kanë deformuar rezultatin. PS nuk ishte në garë si një parti politike, por si një shtet dhe pushtet i tërë. Të gjitha asetet qeveritare dhe shtetërore ishin në shërbim të kandidatit të saj. Ajo që ndodhi në Himarë është në fakt një paralajmërim i frikshëm politik se kjo do të ndodhë edhe në zgjedhjet e përgjithshme 2025”, thuhet në njoftim.
Sipas kësaj partie, qeveria duhet të ndalojë përdorimin e aseteve publike dhe institucioneve shtetërore për qëllime elektorale.
“Zgjedhjet në vitin 2025 do të dëshmojnë se ne nuk do të jemi më një demokraci hibride, por një diktaturë hibride”, përfundon deklarata.
/a.r
