Pavarësisht vendimit për ndryshimin e mandateve për secilën nga zonat elektorale në vende, Komisioni Qendror i Zgjedhjeve nuk ka arritur që të marrë një vendim për këtë çështje.
Në mbledhjen e sotme, kur kanë nisur diskutimet dhe përgatitjet për zgjedhjet e ardhshme 2017, vendimi për rishpërndarjen e mandateve ka hasur në kundërshtimin e opozitës.
Sipas kësaj të fundit, është i nevojshëm një informacion më i detajuar në lidhje me shifrat e demografisë në vend. Kjo sepse opozita ngre pretendimin dhe dyshimin se rezultatet e ofruara nga gjendja civile janë të manipuluara.
Sipas të dhënave nga ana e Ministrisë së Brendshme numri i zgjedhësve për 2016 është rreth 4.4 milionë. Ajo që vihet në pikëpyetje është se në cilin qark do të shkojnë 6 mandate deputetësh.
Në diskutim për lëvizje e mandateve është qarku i Korçës, Beratit dhe Kukësit të cilët i shtohen Tiranës dhe Durrësit shkruan Expres. Në këtë kuadër u vendos me një votim të përgjithshëm 5 me 2 për të kërkuar një informacion më të detajuar nga Ministria e Brendshme./a.m.
Zona zgjedhore Mandate Gjithsej 2016
Berat 7
Dibër 6
Durrës 14
Elbasan 14
Fier 16
Gjirokastër 5
Korcë 11
Kukës 3
Lezhë 7
Shkodër 11
Tiranë 34
Vlorë 12
