Eksperti i Arsimit, Ndriçim Mehmeti, është shprehur se infrastruktura për rritjen e fëmijëve në Shqipëri është e rrezikshme.
Komentet Mehmeti i bëri në ‘Ditari i Fundjavës’ nga Erion Dushi në A2 CNN, ku foli mbi situatën e arsimit në vend, pas ngjarjes së rëndë të ndodhur në Tiranë, ku u vra me thikë 14-vjeçari Martin Cani.
Ai tha gjithashtu se rreth ambienteve të shkollave shiten produkte ushqimore të rrezikshme, alkool dhe cigare.
“Infrastruktura për rritjen e fëmijëve është e rrezikshme. Tejet e rrezikshme, sepse nuk ka asnjë parametër sigurie. Flasim për siguri tërësore. Përshembull siguria ushqimore.
Rreth shkollës shitet çdo gjë, me sheqer të shtuar, coca cola, cigare. Dhe ti gjen me ato Vibe, që në klasë të katërt, ose të pestë.
Dhe i shesin si pa gjë të keq, kur t’i shkruan ndalohet për moshën nën 18-vjeç. Në Bulqisë janë helmuar masivisht nxënësit. Në Dibër u asfiksuan nga tymi i Kaldajës. U asfiksuan edhe në Kamëz. Nuk merr përgjegjësi asnjë institucion”, tha Mehmeti.
