Hulk Hogan, një nga figurat më të mëdha dhe më të dashura të wrestling-ut, ka ndërruar jetë në moshën 71-vjeçare. Lajmi është konfirmuar nga kompania World Wrestling Entertainment (WWE), e cila nuk ka dhënë detaje të tjera rreth shkakut të vdekjes.
I njohur për stilin e tij të bujshëm, fizik të jashtëzakonshëm dhe karizmën që elektrizonte skenën, Hogan ndihmoi në transformimin e wrestling-ut nga një spektakël lokal në një industri shumë miliardë dollarëshe. Me flokët biondë, mustaqet e famshme dhe “24-inçët” e tij legjendarë – siç i quante bicepsat – ai u bë një ikonë e vërtetë kulturore.
Pavarësisht se kishte lënë ringun prej vitesh, Hogan mbeti në qendër të vëmendjes. Më së shumti u përfol në vitin 2024, kur u shfaq në Konventën Kombëtare Republikane, ku shqeu bluzën për të zbuluar një fanellë Trump/Vance, në një moment që bëri xhiron e mediave.
I lindur më 11 gusht 1953 në Augusta, Georgia, me emrin Terry Gene Bollea, ai hoqi dorë nga universiteti për të ndjekur rrugën e wrestling-ut. Karrierën e nisi në vitin 1977 dhe shumë shpejt u bë emër i madh në World Wrestling Federation (sot WWE). Emrin “Hulk” e mori pas krahasimeve me personazhin e fuqishëm të serialit The Incredible Hulk, ndërsa “Hogan” iu shtua për efekt skenik.
Me një gjatësi prej mbi 2 metra dhe peshë mbi 135 kg, ai vendosi një standard të ri për trupin e mundësve, duke frymëzuar breza të tërë sportistësh dhe fansash.
