Anëtarët e NATO-s kanë nisur të hënën stërvitjen më të madhe të përbashkët në Poloni.
Stërvitja do të zgjasë deri më 16 qershor dhe vijnë në kohën kur vendet e Evropës qendrore dhe lindore kërkojnë garanci më të mëdha për siguri përballë Rusisë gjithnjë e më agresive.
Stërvitjet përfshijnë rreth 31,000 trupa nga Polonia, nga Shtetet e Bashkuara, nga 17 vende të tjera të NATO-s dhe nga pesë vende partnere të NATO-s, transmeton REL.
Rusia ka thënë se çdo prani e trupave të NATO-s pranë kufijve të saj është kërcënim për sigurinë e saj dhe ka paralajmëruar se do të ndërmarrë kundërmasa.
Stërvitjet zhvillohen vetëm disa javë para se NATO-ja të mbajë samitin në Varshavë.
Në këtë samit pritet të vendoset nëse NATO-ja do të rrisë praninë e trupave dhe të pajisjeve në bazat në Poloni dhe në shtetet e Baltikut./a.m.
