Një grua amerikane ka treguar se si ka shpëtuar nga sulmet seksuale natën e Vitit të Ri në Këln.
Caitlin Duncan është një studente nga Seattle dhe është shprehur për New York Times që natën e Vitit të Ri ishte ndarë aksidentalisht nga i dashuri i saj në sheshin e mbushur me njerëz jashtë katedrales së famshme të qytetit, transmeton Klan Kosova. Ajo tregoi se si një burrë ia kishte vjedhur asaj kapelën e më pas një tjetër e ka kapur nga prapa, kurse një burrë i tretë ishte munduar ta puthte në qafë e në fytyrë. Por 27 vjeçarja arriti që të ikte dhe të shkonte në polici mirëpo ata ishin të zënë duke u përpjekur për ta pastruar sheshin dhe e shtynë atë prapë në mes të turmes, ku një grup njerëzish filluan ta tërheqin prej flokësh. Ajo tregon se ishin disa refugjatë sirianë që i ofruan asaj ndihmë. Sipas saj ata formuan një kordon mbrojtës dhe i ofruan telefonin që ta telefononte të dashurin e saj. Çifti arriti të ribashkohej në një stacion hekurudhor, dhe Duncan tregon se në atë moment kishte filluar të qajë nga lehtësimi kur pa të dashurin. Në mesin e grupit sirian ishte edhe Hesham Ahmad Mohammad, një 32 vjeçar që ushtronte profesionin e mësuesit në një shkollë fillore në Aleppo dhe po festonte Vitin e Ri në Këln së bashku me miqtë e tij sirian që së fundmi kishin mbërritur në Gjermani.
Ai është shprehur për New York Times, se ishte i frikësuar se bashkëvendasit e tij do të kryenin ndonjë sulm ndaj Duncan, pasi që sipas tij ata “kishin humbur mendjen” nga pija dhe droga.
“Ne çdo ditë dëgjojmë lajme për refugjatët se si ata janë njerëz të këqinj dhe si duhet të kthehen në shtëpitë e tyre”. “Kur e dëgjoj këtë gjë në lajme, pikëllohem. Kjo sepse ne të gjithë e dimë se në mes të refugjatëve ka djem e njerëz të këqinj, por askush nuk flet për njerëzit e mirë”, u shpreh Mohammad. Duncan është shprehur se si ajo dhe Mohammad janë miq tani dhe flasin rregullisht. Policia janë shprehur se rreth një mijë burra të dehur shumica nga Arabia dhe Afrika Veriore, janë përgjegjës për qindra ngacimeme seksuale që ndodhën në Këln, kështu duke shkaktuar protesta të shumta në gjithë vendin kundër refugjatëve.
