Nard Ndoka, në një intervistë për Panoramën, ka shpjeguar se përse ka propozuar disa ndryshime në ligj, në mënyrë që aborti të konsiderohet ‘vrasje me dashje’.
Kryetari i PDK-së thotë se aborti është një krim në familje.
“Për ne si forcë politike, familja dhe jeta është e shenjtë. Në vendin tonë ka një rritje të ndjeshme të numrit të aborteve,” thotë Ndoka.
Ndërkohë duke komentuar kuotat për përfaqësimin e grave në politikë, Ndoka thotë se kjo ka sjellë çoroditje, mungesë koordinimi dhe mungesë të zërave në institucione.
“Nje femër nuk mund të bëhet politikane me listë, nuk mund të bëhet me zor”.
Sipas Ndokës, femrat duhet të konkurrojnë vetë në politikë, pasi kur vijnë me listë po prishin balancat pasi janë më oportune ndaj linjës së kryetarit.
“Kështu ato acarojnë edhe vetë komunitetin, siç ishte një rast përmbytjesh, kur një femër që ndodhej në listën e këshilltarëve të bashkisë ofendoi koleget e saj, me epitete banale, pse nuk ngrinin zërin për përmbytjet, por ishin në këshill vetëm për të ulur e ngritur kartonët”.
Sipas Ndokës, lidhjet homoseksuale nuk janë dashuri, por devijenca seksuale.
“Është më tepër një term që përdoret në politikë, kur duan të paraqesin dikë pa vlera, për ta ofenduar. Madje, kjo tregon se shoqëria nuk e pranon gjerësisht këtë devijancë dhe e përdor për negativitet”.
