Portieri i Kombëtares së Shqipërisë, Etrit Berisha, ka mundësi të mëdha që edicionin e ardhshëm të jetë pjesë e skuadrës së Napolit, ka shkruar “Calciomercato”.Berisha, 28-vjeçar, është pjesë e Atalantas dhe edicionin e shkuar ishte ndër portierët më të vlerësuar në Serie A.
Ai te Napoli shihet si pasardhës i denjë i spanjollit Pepe Reina, të cilit në fund të këtij edicioni i skadon kontrata.”Etrit Berisha është njëri prej kandidatëve kryesorë për të zëvendësuar Pepe Reinan te Napoli në fund të këtij edicioni”, ka shkruar sajti italian.
Berisha ka kontratë me skuadrën e Atalantas deri në verën e vitit 2021, kurse kartoni i tij vlerësohet rreth shtatë milionë euro.
Ai prej vitit 2013 luan në Itali. Fillimisht iu bashkua skuadrës së Lazios nga Kalmari i Suedisë. Prej verës së vitit 2016 është pjesë e Atalantas që këtë edicion po paraqitet në Ligën e Evropës.
Fillimisht u huazua nga Lazio, e këtë verë Atalanta bleu kartonin e tij. Berisha prej vitit 2012 është pjesë e Kombëtares së Shqipërisë dhe deri më tani ka regjistruar 46 paraqitje, citohet Express. (b.an)
