Nga Selenica e Vlorës, kreu i Policisë së Shtetit, Gledis Nano e vuri theksin tek një nga sfidat kryesore, atë të zhdukjes së fenomenit të kultivimit dhe trafikimit të kanabisit.
“Zero kultivim për këtë vit”, ishte mesazhi që përcolli edhe në këtë qark, teksa kërkoi nga të gjithë angazhim e bashkëpunim “që bashkërisht ta minimizojmë deri në zhdukje këtë fenomen, që sjell veç krim dhe asnjë të mirë për shoqërinë”.
Nano theksoi se Vlora dhe disa qarqe të vendit janë zona me risk të lartë dhe të mesëm në drejtim të kultivimit të kanabisit dhe për këtë duhet me patjetër që secili të bëjë sa më mirë detyrën.
Më tej ai u shpreh se nga të gjitha institucionet e administratës publike dhe ato private, Policia e Shtetit e ka paguar më shtrenjtë nga të gjithë luftën kundër kanabisit, duke sjellë në vëmendje edhe humbjen efektivit të policisë, Saimir Hoxha, i cili u vra teksa po kthehej pasi kishte shkatërruar një parcelë kanabisi.
/a.r
