Pesë ditë përpara se të ndodhte ngjarja e rëndë e vrasjes dhe groposjes së fëmijës 8-vjeçar në fshatin Grecalli të Fierit, 38-vjeçari Klodian Çalamani ishte verifikuar për herë të fundit nga policia.
Në 7 muajt e fundit, Çalamani është kontrolluar dhe verifikuar 7 herë nga strukturat e Policisë së Fierit.
Këto të dhëna i bëri të ditura Drejtori i Përgjithshëm i Policisë së Shtetit, Gledis Nano, gjatë raportimit të tij në Komisionin Parlamentar të Sigurisë Kombëtare.
Në të gjitha rastet e verifikimit të Çalamanit nuk ka patur probleme, ndërkohë që informacionet në rrugë operative ndaj 38-vjeçarit kanë qenë në kuadër të vjedhjeve dhe nuk ka patur të dhëna për veprime të dhunshme apo krime të rënda.
“Në datën 19.4.2021, ora 14:01, është verifikuar shtetasi Klodian Çalamani në fshatin Grecalli nga specialisti i policisë së zonës. Nuk ka pasur probleme.
Në datën 19.5.2021 ora 13:05, është verifikuar i njëjti shtetas nga specialisti i policisë së zonës dhe është kontrolluar. Nuk ka pasur probleme.
Në datën 9.7.2021, ora 16:13, është verifikuar dhe kontrolluar dhe nuk është konstatuar asgjë e kundraligjshme.
Në datë 9.7. 2021 përsëri është kontrolluar dhe verifikuar nga specialisti i policisë së zonës. Të gjitha këto janë veprime që janë dokumentuar në sistemet e Policisë së Shtetit.
Në datën 13.8.2021, ora 15:35, është kontrolluar shtetasi Klodian Çalamani nga specialisti i policisë së zonës dhe nuk ka pasur probleme.
Në datën 22.9.2021 është kontrolluar në orën 01:12 nga punonjësi i patrullës së policisë dhe nuk ka pasur probleme.
Informacioni i fundit i marrë në rrugë operative lidhur me aktivitetin kriminal të këtij shtetasi ka qenë në datën 11, ndërkohë që ngjarja ka ndodhur në datën 16 dhe përsëri ky informacion ka qenë në fushën e vjedhjes apo në fushën e krimeve kundër pronës. Nuk ka pasur informacion lidhur me aktivitetin e këtij personi në drejtim të krimeve të rënda apo të dhunshme”, deklaroi Gledis Nano.
Aktualisht Klodian Çalamani është i arrestuar dhe mbahet në burgun e Vlorës si i akuzuar për vrasjen dhe groposjen e 8-vjeçarit.
Drejtori i Policisë së Shtetit, Gledis Nano, ka folur për ngjarjen e rëndë në fshatin Grecalli të Fierit, ku Klodian Çalamani vrau dhe groposi një fëmijë 8-vjeçar në oborrin e banesës së tij.
Gjatë raportimit në Komisionin Parlamentar të Sigurisë Kombëtare, Nano e konsideroi një ngjarje tepër të rëndë rastin e Fierit.
Nano bëri me dije se Klodian Çalamani është person me precedent të mëparshëm penal. Ndaj tij ka patur kallëzime për vjedhje banesash, si dhe ka qenë i dënuar për heqje të paligjshme të lirisë për një ngjarje të ndodhur në vitin 2006. Për këtë krim, Çalamani u lirua në vitin 2009 pasi përfundoi dënimin.
Nga kjo kohë, drejtori Gledis Nano theksoi se për Klodian Çalamanin nuk ka patur informacione apo kallëzime ndaj tij për dhunë në familje apo abuzime seksuale.
g.kosovari
