Çmimet e naftës Brent u rritën ndjeshëm të enjten, duke kaluar mbi 119 dollarë për fuçi, pas sulmeve të Iranit ndaj objekteve energjetike në Lindjen e Mesme. Sulmet erdhën si kundërpërgjigje ndaj goditjes së Izraelit mbi fushën e gazit South Pars, një nga depozitat më të mëdha të gazit natyror në botë.
Reuters shkruan se kontratat e së ardhmes për naftën Brent u rritën me 7.39 dollarë, ose 6.9%, duke arritur në 114.77 dollarë për fuçi në orën 10:26. Më herët gjatë sesionit, Brent kishte kapërcyer mbi 10 dollarë, duke arritur në 119.13 dollarë, pranë nivelit më të lartë të tre viteve e gjysmë, të arritur më 9 mars.
Nafta e papërpunuar amerikane West Texas Intermediate (WTI) u rrit me 27 cent, ose 0.3%, duke arritur në 96.59 dollarë për fuçi, pasi më herët kishte fituar gati 4 dollarë duke tregtuar në 100.02 dollarë. WTI po tregtohet me diferencën më të madhe ndaj Brent në 11 vite.
Banka Qendrore e SHBA-ve mbajti normat e interesit të pandryshuara të mërkurën, duke parashikuar inflacion më të lartë ndërsa politikëbërësit marrin në konsideratë ndikimin e luftës.
Sulme dhe kundërsulme
Izraeli sulmoi fushën e gazit South Pars të Iranit, por SHBA-të dhe Katari nuk ishin të përfshirë, tha presidenti Donald Trump të mërkurën vonë.
South Pars është sektori iranian i depozitës më të madhe të gazit natyror në botë, të cilën Irani e ndan me aleatin e SHBA-ve, Katarin, në anën tjetër të Gjirit.
Trump shtoi se Izraeli nuk do të sulmojë përsëri objektet iraniane në South Pars, përveçse nëse Irani sulmon Katarin, dhe paralajmëroi se SHBA-të do të përgjigjen gjithashtu nëse Irani vepron kundër Dohas.
Të mërkurën, kompania QatarEnergy tha se sulmet me raketa të Iranit ndaj Ras Laffan, vendi i uzinave kryesore të LNG të Katarit dhe më i madhi në botë, shkaktuan “dëme të mëdha”.
Çmimet e gazit europian u rritën në nivelin më të lartë në mbi tre vite.
Arabia Saudite tha se kishte interceptuar dhe shkatërruar katër raketa balistike të lëshuara të mërkurën drejt Riadit dhe një sulm me dron ndaj një objekti gazi.
