Turqia ka hedhur poshtë pretendimet ruse, se zyrtarë të lartë turq, përfshirë edhe presidentin Erdogan e familjarë të tij janë pjesë e kontrabandës së naftës që tregtohet jashtë Sirisë nga Shteti Islamik ISIS.
Erdogan ka reaguar duke i cilësuar shpifje akuzat e palës ruse. “Askush nuk ka të drejtë të shpifë”, ka thënë presidenti turk, i cili ka nënvizuar sërish se nuk dëshiron një përkeqësim të marrëdhënieve me rusët.
Por sipas zv.komandantit të Shtabit të Përgjithshëm rus, Serghiei Rudskoi, ekzistojnë një rrugë perëndimore që çon në portet turke në Mesdhe, një tjetër veriore që çon tek rafineria në Patme dhe një tjetër lindore që çon në një bazë të madhe në qytezën Zhizdra. Zyrtari i lartë rus ka deklaruar se, një pjesë e naftës së ISIS që mbërrin në Turqi është e destinuar për tregun e brendshëm dhe pjesa tjetër shitet jashtë shtetit për t’u rafinuar.
“Konsumatori kryesor i kësaj nafte që u vidhet pronarëve legjitimë, Sirisë dhe Irakut, del se është Turqia. Pas informacioneve të siguruara ka rezultuar se, klasa politike në pushtet, ku bën pjesë presidenti Erdogan dhe familja e tij, janë të përfshirë në këtë tregti ilegale”, ka deklaruar zyrtari rus në konferencën për shtyp.
