Është një iniciativë e ndërmarrë prej kohësh, por së fundmi, aktivistja e të Drejtave të Njeriut po e përcjell drejt fundit. Elsa Ballauri mëton se në fund të qershorit muzeu i grave shqiptare do të jetë pjesë e rrjetit të muzeumeve botërore të grave. Kjo iniciativë personale është ndërmarrë nga aktivistja Elsa Ballauri në kuadër të She-culture…
Prej vitesh angazhimi i saj në kauzën e të drejtave të njeriut ka pasur brenda dhe një mbikohë, që aktivistja e të drejtave të njeriut Elsa Ballauri, ia ka kushtuar ideimit dhe krijimit të një muzeu të grave, që do jetë në fund të qershorit në Tiranë. Ky koncept, i përkthyer edhe në realitet, është i gjallë në pak vende. Por ditët e fundit, aktivistja ka arritur ta bëjë në mënyrë institucionale. Aty të rinjtë, por edhe të gjithë shqiptarët do të shohin laboratorin e përditshmërisë së gruas shqiptare. Elsa Ballauri e inincoi këtë aktivitet, ku shpalli dhe fillimin e muzeut përmes projektit të She-culture, e nëpërmjet partnerit, Muzeu i Grave/MiG.
She-Culture është një projekt 2 vjeçar (2013-2015) në kuadër të Programit Kulturor të Bashkimit Europian 2007- 2013, që mbart qëllimin të promovojë diversitetin kultural dhe dialogun ndërkulturor. Deri më tash Muzeumet e Grave në 5 vende europiane, janë realitet. Dhe, organizatat që i kanë krijuar ato, janë edhe partnere të këtij projekti, respektivisht Italia, Spanja, Danimarka, Norvegjia dhe Shqipëria. Projekti drejtohet nga shoqata ECCOM me qendër në Romë. Në aktivitetin e zhvilluar pak ditë më parë ishte edhe ambasadorja e Bashkimit Europian Romana Vllahutin që u shpreh se: investimi tek njerëzit dhe kultura është i rëndësishëm ndërsa e quajti alarmant shifrën e buxhetit vjetor të teatrit kombëtar të Operës dhe Baletit. “Po mendoja për këtë aktivitet sesi edhe ne shekullin e 21 duhet të diskutojmë dhe të promovojmë sesi të mbrojmë të drejtat e gjysmës së njerëzimit.
Për herë të parë dëgjova nga Elsa për muzetë e grave. Mu duk ide e mahnitshme. Gjithë muzetë ngrihen mbi historinë zyrtare që shkruhen nga burrat. Ky muze është i veçantë, pasi vizitorët e huaj tashmë mund të krijojnë një mendim për Shqipërinë. Përpara se të vija këtu po iu tregoja disa të ftuarve në këtë event një shifër alarmuese për mua lidhur me kulturën. Buxheti vjetor për Teatrin Kombëtar i Operës dhe Baletit është 100.000 euro ndërsa buxheti vjetor i Ministrisë së Kulturës është 10 milionë euro. Është jashtëzakonisht i ulët. Nuk mjafton të investosh në infrastrukturë, investimi më i rëndësishëm është investimi tek njerëzit.”- u shpreh Vllahutin.
Kurse vetë Ballauri do të shprehej se “Kur krijohet një museum grash është pjesë e luftës që gruaja bën thellë në subkoshiencës së saj drejt barazisë, civilizimit dhe bashkëpunimit me pjesën tjetër mashkullore. Nuk e shikoj vetëm si revolt psikologjike apo sociale, e shikoj edhe si kuriozitet. Gruaja ka një jetë jashtëzakonisht të pasur”.
Muzeu, që fillimisht do jetë modest, do të hapë dyert në fund të këtij muaji dhe bazohet mbi jetën qytetare shqiptare, ku objektet do të identifikojnë fusha të ndryshme të kontributit të gruas shqiptare me familjen apo shoqërinë në shekullin e fundit.