Jeta e qindra muxhahedinëve në Shqipëri është në rrezik. Pas bombardimit nëpër kampe dhe zona të ekspozuara, autoritetet e Iranit kanë tentuar t’i godasin muxhahedinët edhe në qendrat e azilit politik në Shqipëri, me anë të infiltrimit të agjentëve sekretë.
Shërbimet partnere, kryesisht të SHBA, kanë zbuluar dhe parandaluar një tentativë të Iranit për të eliminuar krerët e muxhahedinëve në Shqipëri. Sipas, një artikulli të DW, shërbimet e Iranit kishin nisur dy gra në Shqipëri për të eliminuar krerët e muxhahedinëve, por sapo misioni i tyre është dekonspiruar, dy gratë janë larguar.
“Irani i konsideron muxhahedinët terroristë, armiq potencialë të regjimit që kërkojnë ta rrëzojnë atë. Nuk përjashtohet mundësia që ata të jenë objekt i akteve subversive nga shërbimet sekrete iraniane. Shërbimet tona të antiterrorizmit janë njoftuar vitin e kaluar nga shërbimet sekrete të vendeve partnere që në Shqipëri kishin hyrë dy gra, të njohura si ekzekutore për të ekzekutuar drejtues të grupit të muxhahedinëve, që strehohen në Shqipëri.
Misioni i tyre u dekonspirua dhe ato dolën nga territori shqiptar, pasi policia rriti shumë kontrollet. Për garantimin e jetës së muxhahedinëve në Shqipëri përveç vëmendjes së shtetit shqiptar, hyn në lojë bashkëpunimi me vendet partnere të NATO-s, kryesisht SHBA-të”, thotë Artan Hoxha. Sipas Komisariatit të Lartë të Kombeve të Bashkuara për Refugjatët (UNHCR) dhe gazetës “Uashington Post”, (14 shkurt 2016) deri tani në Shqipëri jetojnë 700 muxhahedinë që pritet të shtohen nga të tjerë gjatë këtij viti.
