Kryeministri Isa Mustafa ka shprehur përkushtimin dhe vullnetin e plotë të qeverisë kosovare për dialog të pakushtëzuar dhe brenda institucioneve të Republikës së Kosovës me opozitën.
Duke iu përgjigjur interesimit të gazetarëve pas vizitës në Ministrinë e Bujqësisë, Pylltarisë dhe Zhvillimit Rural, kryeministri Mustafa theksoi se partnerët e koalicionit qeveritar kanë bërë ofertë që nga fillimi për dialog.
“Dialogu nënkupton bashkëbisedim, ta themi në gjuhën popullore. Jemi të gatshëm në çdo moment që të ulemi të bisedojmë, por të bisedojmë për problemet reale, për problemet të cilat na preokupojnë të gjithë neve, jo për tema dhe për ultimatume, sepse me ultimatume nuk mund të zgjidhen çështjet. Ne kemi thënë se nuk paragjykojmë që të ulemi e të diskutojmë”, tha kryeministri.
Kryeministri Isa Mustafa, po ashtu, theksoi se pret që opozita do të kthehet në Kuvend.
“Presim që ajo do të pranojë kërkesën dhe ofertën për dialog dhe që përmes dialogut pastaj ne mund të zgjidhim shumë nga problemet. Kemi shumë probleme në Kosovë për të cilat kemi të gjithë interes të ulemi bashkë e të diskutojmë. Deputetët tanë i kanë marrë votat nga qytetarët e Republikës së Kosovës për të përfaqësuar interesat e tyre dhe për të zgjidhur këto interesa. Këto interesa në mënyrë institucionale zgjidhen në Kuvendin e Republikës së Kosovës. Ne nuk mohojmë të drejtën e njerëzve që të protestojnë, sepse çdokush ka të drejtë ta bëjë atë, por, po ashtu, nuk pranojmë që protestat të jenë të dhunshme dhe që sjelljet të jenë të dhunshme në pikëpamje të realizimit të interesave politike, sepse interesat e tilla nuk kemi nevojë t’i realizojmë përmes metodave të tjera, përveç metodave demokratike”, tha kryeministri Mustafa.
