Kryeministri i Kosovës, Isa Mustafa priti të enjten në një takim kryeministrin Edi Rama me të cilin diskutoi për forcimin e mëtejshëm të bashkëpunimit ndërmjet dy shteteve si dhe për proceset zhvillimore në Kosovë, Shqipëri dhe rajon.
Sipas zyrës së shtypit pranë qeverisë kosovare, Kryeministri Mustafa, pasi e njoftoi kryeministrin Rama për progresin në Kosovë, shprehu përkushtimin e Qeverisë së Kosovës për zgjerimin e shkëmbimeve dhe të raporteve ndërmjet dy shteteve.
Kryeministri Edi Rama vlerësoi arritjet në Kosovë, duke shprehur vullnetin e qeverisë së Shqipërisë për thellimin e bashkëpunimit bilateral me Kosovën.
Gjatë takimit u bisedua edhe për proceset integruese euroatlantike dhe për angazhimin e dy vendeve në këtë rrugë.
Në takim ishin të pranishëm edhe zëvendëskryeministrat Hajredin Kuçi dhe Ramiz Kelmendi. /b.d
