Përfshirja e ish-kreut të Shërbimit Informativ Shtetëror të Shqipërisë në listeën e personave që u është njohur statusi i veteranëve të UÇK-së ka ngjallur reagime të forta në Kosovë, madje edhe nga vetë kryeministri Isa Musrafa.
Sipas këtij të fundit, pavarësinë Kosova e ka fituar falë mençurisë dhe urtësisë së Ibrahim Rugovës. Jo vetëm kaq por sipas Mustafës shërbime sekrete si SHIK-u në Shqipëri me sjelljet e tij më shumë i ka shërbyer Serbisë se sa pavarësisë së Kosovës.
“Kosova u çlirua, sepse pati në krye një burrështetas të urtë e të mençur, të respektuar brenda e jashtë vendit, Presidentin Ibrahim Rugova. Kosova nuk do të çlirohej kurrën e kurrës po të varej nga shërbimet informative, siç ishte edhe SHIK-u shqiptar, sepse shërbime të tilla me sjelljen e tyre më shumë u kanë shërbyer regjimeve dhe Serbisë, vëllavrasjes e hasmërive të brendshme, sesa pavarësisë së Kosovës dhe interesave kombëtare. Pa infiltrim dhe përzierje të SHIK-ut, UÇK do të ishte më unike dhe lufta do të ishte më e organizuar. Sot na vjen keq kur shohim se nga një gojë e keqe e një kryespiuni, spërkatet figura e Ibrahim Rugovës.” Shkruan Mustafa në Facebook.
Reagimi i Kryeministrit të Kosovës erdhi pas deklaratave të bëra nga vetë Klosi i cili tha se politika e Ibrahim Rugovës ishtë diçka pa krye. Sa i përket statusit të tij prej veterani të UÇK-së, Klosi tha se ndihej krenar që ka pasur rastin ta ndihmojë luftën e UÇK-së.
“E quaj veten me fat që kam arritur të rreshtohem krah për krah me çunat që e bënë luftën në Kosovë. Lufta e UÇK-së ishte një luftë e madhe për gjithë kombin shqiptar, sidomos për Kosovën”, ka deklaruar Klosi.
Ndërsa sa i përket akuzave të bëra nga politikanë kosovarë, se SHIK-u shqiptar ka vrarë Ahmet Krasniqin, ish-ministri i Mbrojtjes së Kosovës, Klosi i ka hedhur poshtë këto akuza duke u shprehur se shteti shqiptar nuk ka pasur asnjë interes për diçka të tillë.
Redaksia Online
(Javanews.al)
