Ish- drejtori i Shërbimit Informtiv Shtetëror të Shqipërisë, Fatos Klosi, deklaroi pak ditë më parë në mediat kosovare se politika e Ibrahim Rugovës ishtë diçka pa krye.
Kaq ka mjaftuar që vetë kryeministri kosovar Isa Mustafa ta vejë Klosin përballë akuzave. Sipas Mustafës, Kosova u çlirua sepse në krye pati një burrë shteti të urtë dhe të mençur siç ishte Presidenti Rugova.
Përmes një postimi në Facebook, kryeministri kosovar shprehet se Kosovoa nuk do të çlirohej kurrë po të ishte në dorë të SHISH-it shqiptar sepse shërbime të tilla u kanë shërbyer Serbisë, vëllavrasjeve dhe hamërive të brendshme.
Fatos Klosi ishte i ftuar në Kosovë në një sërë aktivitetesh. Së fundmi u bë publik fakti se ai mban edhe statusin e veteranit të luftës duke përfituar edhe pension nga Prishtina.
Postimi i plotë i kryeministrit Isa Mustafa:
Kosova u çlirua, sepse pati në krye një burrështetas të urtë e të mençur, të respektuar brenda e jashtë vendit, Presidentin Ibrahim Rugova. Kosova nuk do të çlirohej kurrën e kurrës po të varej nga shërbimet informative, siç ishte edhe SHIK-u shqiptar, sepse shërbime të tilla me sjelljen e tyre më shumë u kanë shërbyer regjimeve dhe Serbisë, vëllavrasjes e hasmërive të brendshme, sesa pavarësisë së Kosovës dhe interesave kombëtare. Pa infiltrim dhe përzierje të SHIK-ut, UÇK do të ishte më unike dhe lufta do të ishte më e organizuar.
Sot na vjen keq kur shohim se nga një gojë e keqe e një kryespiuni, spërkatet figura e Ibrahim Rugovës. Një fjalë popullore thotë: arni për thesin. Spiunët arnohen me të tyret, por nuk arnohen me figurën e Ibrahim Rugovës.
