Nga Ben Andoni
Muri, i cili sot lartësohet në mjedisin përreth Urës mbi lumin Ibër në Mitrovicë, është barriera e re fizike që e ndan Serbinë dhe Kosovën. Për palën kosovare ka bindje dhe propagandë nga autoritetet se ai do të prishet, kurse për palën serbe po ashtu parashtrohet argumenti se muri nuk do të prishet. Një vendim ose një shprehje e vullnetit të mirë pritet në takimin e radhës së zyrtarëve më të lartë të dy vendeve, që do të ndodhë në orët në vazhdim, por deri më atëherë, duket se pos premtimeve për prishjen e tij asgjë nuk do ndodhë.
Madje, mëtohet nga serbët e Veriut se projekti ka qenë madje edhe në marrëveshjet mes dy palëve. Autoritetet e Brukselit thonë se palët duhet të merren vesh, kurse në Prishtinë, përfaqësuesit evropianë bëjnë thirrje për qetësi dhe zgjidhje të çështjes së murit.
Paradoksi është se publiku kosovar haset me tre të vërteta. Ajo që parashtrohet nga pala e tyre kosovare; ajo nga pala serbe, dhe kuptohet dhe pala që përfaqëson Brukselin. Tashmë pala kosovare ka miratuar një rezolutë në parlament për prishjen e murit, që në fakt duhej të zbatohej deri në fund të janarit. Por, kjo s’ka ndodhur. Ndërkohë që kreu i komunës së Veriut Goran Rakiç, vazhdon të pretendojë se muri nuk prishet dhe se për atë ka dakordësi mes palëve! Kjo e ka bërë Vetëvendosjen që të përgatitet për protesta dhe për fillimin e një lëvizje kundër kësaj barriere, e cila e ka sfiduar hapur integritetin e Kosovës.
Me shumë gjasa, muri do të qëndrojë edhe disa kohë, por edhe nëse do të prishet, të tjera barriera të reja do të vendosen mes dy pjesëve të Mitrovicës.
Ka një dezinformim sa i përket kushteve që çuan në ndërtimin e saj. Pala serbe pretendon se muri i ngritur në veri të Mitrovicës, gjendet në projektin e Brukselit për revitalizimin e urës, kuptohet jo në lartësinë aktuale, mirëpo se muri është pjesë e këtij projekti të shumëpërfolur.
Këtë gjë e ka pohuar, pak ditë më parë, zyrtarja ekzekutive në komunën e Mitrovicës Veriore Adriana Hoxhiç, e cila ka thënë gjithashtu se rrëzimi i tij nuk është në dorën e komunës.
Po kujt komune?! Ajo e Veriut, administruar nga serbët, nuk pranon; kurse ajo e Jugut, administruar nga shqiptarët s’ka tagër mbi këtë pjesë të qytetit. Problemi i ndarjes, ku futet Ura, që tashmë konsiderohet si Park është politik dhe është folur përgjatë të gjithë mbledhjeve të dialogut.
Ndërkohë, Ministri i Ambientit e Planifikimit Hapësinor në Kosovë, Ferat Shala, kërkon një vendim të ri të qeverisë për rrënimin e murit ilegal në veri, raporton media kosovare. Aman, është e habitshme se ka një rezolutë parlamentare dhe se ajo nuk zgjidhet. Arsyeja duhet kuptuar në dështimin apo gjetjen e mekanizmave për ta rrënuar murin sipas afatit të dhënë me rezolutën e Kuvendit të Kosovës. Një përgjigje ekziston për këtë: palët politike janë shumë të ndara edhe pse rezoluta e miratuar në Kuvend më 29 dhjetor ishte harmonizuar dhe votuar pothuaj nga të gjithë deputetët e partive në pushtet.
Ajo që thuhet është se pas përfundimit të të gjitha përgatitjeve ligjore nga ana e Ministrisë, po pritet një vendim tjetër nga Qeveria e Kosovës, meqë edhe pas diskutimeve s’gjen zgjidhje kjo çështje përmes dialogut.
Por sikur të mos mjaftojë kjo, serbët pretendojnë se do sulmohen nga Kosova në muajin shkurt!!! “Hashim Thaçi, Isa Mustafa dhe Kadri Veseli po merren vesh për një sulm të rrufeshëm, befasues në veri kundër serbëve…Po iu ngutet për ta pushtuar veriun sepse po i frikësohen politikës së re të Trumpit që do t’ia lëshojë Ballkanin Rusisë…, shkruan portali serb Informer duke shtuar edhe faktin se autoritetet serbe janë informuar nga shërbimi sekret rus dhe nga një shërbim tjetër informativ mik i Beogradit.
Sipas informatave të këtyre shërbimeve, sulmi kosovar, planifikohet të bëhet gjatë natës dhe ai do të kryhej nga pjesëtarë të ROSU-s dhe të njësive të tjera policore!!!
“Çdo gjë është menduar ashtu që me vrap, në afatin prej 24 orësh, të pastrohen serbët dhe të merret veriu i Kosovës, krejt deri në Jarinje. Aksioni do të arsyetohej me një incident të inskenuar në të cilin do të plagoseshin ose vriteshin disa policë shqiptarë. Pastaj aksioni do të prezantohej si legjitim ndaj luftë nxitjes së Beogradit, përkatësisht mbrojtjes së shqiptarëve nga agresioni serb”, përfundon shkrimi.
Dhe, si zakonisht, ka ardhur edhe prononcimi i kryetarit të Këshillit për Kosovën Milovan Drecun, i cili e shton dozën e fantazmagorisë dhe parasheh dështimin e këtij operacioni. Sido që të jenë zhvillimet e këtyre ditëve duket se Kosova do të vuajë ende kakofoninë e zërave të saj, kurse Serbia do mundohet të përfitojë sa të mundet që të lehtësojë rrugën e saj evropiane.
Për presidentin Hashim Thaçi dhe kryeministrin Isa Mustafa muri e ka kohën e limituar. Deri kur?! S’dihet. Ajo që duhet është që Kosovës politike i nevojitet realisht të maturojë forcat dhe të bashkohet përballë një realiteti, që për hir të së vërtetës nuk është shumë pro saj. (Javanews)
