Disa deputetë të opozitës kishin kërkuar seancë dëgjimore me Ministrin e Shëndetësisë Ilir Beqaj në Komisionin për Punën, Çështjet Sociale dhe Shëndetësinë ditën e stome në lidhje me “Chep Up”. Për shkak të axhendës së caktuar javë më parë, ministri nuk mundi të ishte i pranishëm duke bërë edhe njoftimin e drejtuesve të Komisionit. Pavarësisht njoftimeve, deputetja demokrate Albana Vokshi e ka cilësuar mungesën si rast të paprecedentë. Ndërkohë, Ministria e Shëndetësisë zbardh korespondencat që tregojnë pamundësinë e ministrit për të qenë i pranishëm dhe disponibilitetin e tij për një ditë tjetër sipas këtij institucioni.
Më poshtë njoftimi dhe korespondencat:
Lidhur me kërkesën për pjesëmarrje të Ministrit të Shëndetësisë, në mbledhjen e datës 26 tetor 2016 të Komisionit për Punën, Çështjet Sociale dhe Shëndetësinë të Kuvendit të Shqipërsië, të kërkuar nga anëtarë të Komisionit deputetë të Grupit Parlamentar të Partisë Demokratike, sqarojmë se z. Ilir Beqaj, ka shprehur menjëherë gatishmërinë e tij, si në çdo rast, për të marrë pjesë dhe për të raportuar në lidhje me çështjen e raportuar të rendit të ditës.
Por, për shkak të aktiviteteve të shumta të përcaktuara javë më parë dhe të pamundësisë së anullimit të tyre, Ministri i Shëndetësisë ka njoftuar Komisionin për pamundësinë e pjesëmarrjes në datën dhe orën e caktuar, duke propozuar që mbledhja të organizohet javën e ardhshme, në një orët që do të caktohet nga Komisioni, ditën e Martë, më datë 1 Nëntor 2016, ditën e Mërkurë, më datë 2 Nëntor 2016, pas orës 13:00, ose ditën e Premte, më datë, 4 nëntor 2016, në një orë të vlerësuar të përshtatshme nga Komisioni.
Ju lutem, gjeni bashkëlidhur këtij njoftimi një kopje të praktikës shkresore të këtij komunikimi.
/a.m.
