Ministria e Shëndetësisë ka reaguar ditën e sotme në lidhje me lajmin e publikuar për një 57-vjeçar të sëmurë në Laprakë.
Nisur nga pretendimet në media, ministria në fjalë sqaron se autoambulanca ka mbërritur vetëm 7 minuta pas raportimit. Sipas saj, lëvizja e mjekëve vërtetohet edhe nga kartela elektronike.
“Në shkrimin me titull: “Pamje të rënda/ 57-vjeçari vdes në rrugë, dëshmitari: Ambulanca s’ishte fare”, të botuar dje (18/02/2017) në portalin informativ online “Balkanëeb.com” raportohet se një qytetar i sëmurë ka qendruar për afro 20 minuta i shtrirë në rrugë në një zonë të Laprakës, në Tiranë, dhe se autoambulanca është vonuar shumë për ti ardhur në ndihmë. E vërteta është krejt ndryshe” – shkruan Ministria e Shëndetësisë.
Sipas dikasterit në fjalë, siç mund të verifikohet nga video e regjistrimit elektronik të shërbimit të urgjencës nëpërmjet sistemit GPS të aktivitetit të lëvizjes në terren të autoambulancës “TR 9926 K Urgjenca e Tiranës”, thirrja është marrë nga centrali i shërbimit të urgjencës mjekësore në orën: 11:06, dhe autoambulanca e shërbimit mjekësor të urgjencës mbërritur në vendngjarje në orën 11:13.
“Autoambulancës i janë dashur 7 minuta për të mbërritur në vendodhjen e personit në nevojë pas marrjes së thirrjes dhe jo siç raportohet në shkrimin e sipërpërmendur.” – njofton MSH./b.d
