Trajneri Jose Mourinho ka dhënë konferencën e parë të shtypit si trajneri i Tottenhamit. Ai ka një detyrë të vështirë të rikthejë skuadrën në rrugën e duhur, pasi fillimi i sezonit ishte shumë i dobët me teknikun Mauricio Pochettino. Portugezi mbetet gjithmonë karizmatik dhe këtë e shfaqi dhe në konferencën e parë për shtyp. Elozhet për Pochettinon nuk munguan, po ashtu dhe për skuadrën, ndërsa duket se do të kemi ndryshim epiteti të Mourinhos nga “The Special One” në “The humble one”.
“Kam pasur kohë të mendoj për shumë gjëra dhe kam kuptuar se gjatë karrierës sime kam bërë gabime. Nuk do të bëj më gabime të njëjta, por do të bëj gabime të reja“, tha Mourinho.
Ai foli dhe në lidhje me përulësinë e tij, si një tipar që nuk e zotëron, por sërish i doli kundër gazetarëve. “Jam i përulur. Jam mjaftueshëm i përulur sa për të analizuar karrierën time. Jo vetëm vitin e kaluar, por kam menduar dhe problemet dhe zgjidhjet. Në analizën time kam kuptuar se nuk duhet të fajësoj asnjë. Unë jam gjithmonë i përulur, por problemi qëndron se ju nuk e kuptoni. Jam i përulur në mënyrën time“.
“The Special One” ka folur dhe për shpërthimet e tij emocionale dhe kontrollin ndaj tyre. “Kur nuk fitoj nuk jam i lumtur. Nuk mund ta ndryshoj këtë. Nëse je i lumtur kur humb një ndeshje është e vështirë të jesh një fitues në ndonjë moment të karrierës, por duhen kontrolluar emocionet, pasi nuk duhen kaluar caqet. Duhet besim në të tilla situata“.
Ish-trajneri i Realit, Interit, Chelseas dhe Manchesterit ka treguar se nuk ka ndërmend të bëjë ndryshime të mëdha në skuadër. “Dhurata më e mirë janë lojtarët që kam. Nuk kam nevojë për futbollistë të rinj. Më duhet të njoh më mirë lojtarët e mi“, tha Mourinho.
g.kosovari
