Mourinho i druhet kalendarit, Guardiola thotë se Championsi varet nga ekipi i tij. Në Premier League luhet derbi i Manchesterit, City-United, një sfidë e mbetur që i përket javës së 26-të, e cila mund të vendosë shumë për vendin të katërt, që përcakton skuadrën e fundit angleze që merr pjesë në Champions sezonin e ardhshëm.
Citizens mbajnë vendin e katërt me vetëm një pikë më shumë se rivalët e qytetit, të cilët kanë plot 23 ndeshje pa humbje.
“Djajtë e Kuq”, në fakt mund ta sigurojnë Championsin edhe nëse fitojnë trofeun e Europa Leagues, ndërsa për skuadrën e Pep Guardiolës renditja në katërshen më të mirë të kampionatit mbetet ngushëllimi i vetëm në një sezon pa tituj. Por trajneri spanjoll e merr me sportivitet këtë fakt, edhe pse nuk është mësuar kurrë ta mbyllë sezonin pa asnjë trofe.
“Jam prej 9 vitesh trajner dhe ky është sezoni im i parë pa trofe. Një herë do të ndodhte dhe fati deshi të ndodhte në këtë sezon. Nëse karriera ime do të zgjasë për shumë vite sigurisht që do të ndodhë edhe në të ardhmen. Ka shumë klube të mëdha në Europa që po e mbyllin sezonin pa fituar trofe. Kemi edhe 6 ndeshje ndër të cilat katër në “Etihad”, pra pjesëmarrja në Champions varet vetëm nga ne”, ka thënë Guardiola, transmeton Supersport.
Derbit të “nxehtë” të Manchesterit do t’i mungojë një personazh i veçantë, Zlatan Ibrahimoviq, por Guardiola thekson se Unitedi ka lojtarët të tjerë shumë cilësorë, ndaj të cilëve duhet pasur shumë kujdes.
“Ibrahimoviç është një lojtar i madh, por ata kam futbollistë të tjerë shumë të mirë si Lingard, Young dhe Rashford. Mourinho? Marrëdhëniet mes nesh janë të mira, kur jemi përballë njëri tjetrit, përshëndetemi”, ka thënë Pep.
Nga ana tjetër, Jose Mourinho thekson se kalendari i ngjeshur për Unitedin, që është në garë edhe në Europa League favorizon pikërisht Cityn për vendin e katërt.
“Kundërshtarët tanë do të luajnë vetëm një ndeshje në javë deri në fund të sezonit, ndërsa ne kemi dy gjymëfinalet e Europa League, që janë shumë të rëndësishme për ne. Vendi i katërt mbetet shumë i vështirë për t’u arritur, por ne do ta provojmë. Nëse arrijmë të fitojmë Europa League do të jetë e mrekullueshme”, ka thënë Mourinho.
Përveç Ibrahimovicit mungesa të sigurta tek Unitedi janë Rojo, Mata, Jones, Smalling ndërsa Pogba është në dyshim. Ndërkohë Guardiola mund të mos ketë në dispozicion David Silvën, i dëmtuar me Arsenalin në FA Cup. (b.an)
