Motra e madhe Kajtazi: S’i njoh më motrat e mia
Alketa Kajtazi, motra 20-vjeçare e Orialdës dhe Klevisës, është më e prekura në këtë histori të padëgjuar më parë.
Ndonëse diferenca me dy motrat e tjera është e vogël, në rrëfimin e bërë në video, Alketa Kajtazin e transformojnë në “monstër”.
“Ajo është e sëmurë mendore, me kartelë. Duhet të shkoj në psikiatri”, janë akuzat që dy motrat bëjnë në videot e regjistruara për motrën e madhe.
Vajza e madhe e familjes Kajtazi e pyetur dje nga gazeta “Panorama”, Alketa shprehet se ndihet e fyer për sjelljen e dy motrave të vogla.
Sipas saj, me akuzat e ngritura, Orialda dhe Klevisa e kanë ekzagjeruar shumë, pasi e kanë futur familjen në konflikt me të afërmit e tjerë.
Alketa shprehet se përveçse motër, ka qenë edhe prind për to, ndaj nuk i meriton akuzat e ngritura nga dy motrat e saj.
Në atë çka kumton, Alketa tha se, “Klevisa dhe Orialda na kanë ngulur një tjetër thikë pas shpine, diçka që ne nuk e meritojmë. Nuk po arrij t’i njoh më motrat e mia. Bënë çfarë bënë, i kapërdimë, por këto akuza unë dhe prindërit, të cilët na kanë rritur me sakrifica, vërtet nuk i meritojmë. Akuzat e tyre nuk janë të vërteta, ose mund të jenë të vërteta, por ato i tregojnë në një formë për t’u shfajësuar vetë dhe për të na ngarkuar ne fajin për largimin e tyre. Deri para një muaji, kemi qenë një familje krejt normale. Ndoshta ka pasur mosmarrëveshje, por jo të përmasave që pretendojnë Orialda dhe Klevisa”, shprehet Alketa.
AKUZAT
Për Alketën akuzat e ngritura nga Orialda dhe Klevisa nuk qëndrojnë.
“Të gjithë mund të kritikohemi nga persona më të mëdhenj. Edhe unë i kam kritikuar disa herë motrat e mia, sidomos kur kisha përgjegjësinë për to, ndërkohë që prindërit ndodheshin në Greqi.
Por ato e kanë ekzagjeruar fare me deklaratat e tyre, të cilat janë të pavërteta”, tregon 20vjeçarja.
Ajo komenton edhe videon që është krijuar dhe postuar nga vetë motrat e vogla gjatë kohës që strehoheshin në banesën me qira në Vlorë.
“Në video thoshin se nuk e kishin vënë zjarrin në shtëpi, ndërsa në polici e pranuan që e kanë bërë. Po ashtu, në video thoshin se kishin gjetur një portofol me lekë, ndërsa në polici rrëfyen se kishin marrë të gjitha kursimet e familjes. E dëgjova një pjesë të videos dhe ju siguroj se aty nuk ka asgjë të vërtetë. Mua po më vinte turp kur dëgjoja deklaratat e tyre. Ato kishin përfshirë të gjithë fisin, duke na futur në konflikt me të afërmit tanë.
Ato këtë po e bëjnë me qëllim për të na degjeneruar, por ato janë fajtoret kryesore në këtë mes dhe kjo nuk do shumë inteligjencë për t’u kuptuar. Sinqerisht më vjen shumë keq, kur dëgjova se kishin ankesa kundrejt meje, unë që kam qenë jo vetëm motër për to, por edhe prind për një kohë të gjatë”, thekson Alketa Kajtazi. Mësohet se videot 20vjeçarja i ka parë të premten, pikërisht ditën kur policia e Durrësit lajmëroi familjarët për gjetjen e vajzave në qytetin e Vlorës. Por, sipas Alketës, nuk ka mundur t’i shohë plotësisht, pasi i ka ardhur pështirë nga gjithë sajesat, siç i cilëson ajo fjalët e motrave, njëra 18 dhe tjetra 14 vjeç./Panorama/
