Policia Rrugore apeloi sot përdoruesit e rrugës për kujdes maksimal, nisur nga moti i keq, me reshje të dendura shiu dhe erë të fortë.
Policia Rrugore u kërkoi drejtuesve të mjeteve të moderojnë shpejtësinë, pasi në disa akse rrugore ka prezencë të ujit, t’ujapin përparësi këmbësorëve dhe të respektojnë sinjalistikën rrugore.
“Mos përdorni telefonin gjatë drejtimit të mjetit dhe vendosni rripin e sigurimit; Mos kryeni parakalime të gabuara”, thuhet në njoftim.
Po ashtu, për drejtuesit e motomjeteve, biçikletave dhe monopatinave rekomandohet të veshin jelek fosforeshent gjatë natës për të shmangur përfshirjen në ngjarje rrugore.
Këmbësorët duhet të tregojnë kujdes maksimal kur kalojnë nga njëri kah i rrugës në tjetrin.
Policia Rrugore është në detyrë për të parandaluar ngjarjet rrugore dhe për t’iu ardhur në ndihmë përdoruesve të rrugës në nevojë. “Kontributi i të gjithëve është thelbësor për të shmangur aksidentet dhe për të eliminuar vonesat në trafik”, thuhet në njoftim.
/a.r
