Me ardhjen e motit të ftohtë edhe shtimi i masës së energjisë së konsumuar rritet së tepërmi. Kështu OSHEE ka deklaruar se sasia e energjisë që konsumatorët po shpenzojnë gjatë këtyre ditëve është rritur me 30%, duke sjellë kështu një mbingarkesë në pjesë të caktuara të sistemit, e sidomos në Kryeqytet. Kjo ka sjellë që gjatë mbrëmjes së djeshme dhe paradites së sotme të ketë patur probleme teknike në rrjetin energjitik të Tiranës.
Nga informacionet e dispeçerisë qendrore në OSHEE, si pasojë e një defekti në fiderin L6, n/St Qendër, mbrëmjen e djeshme, rreth orës 22:52, gjatë ditës së sotme u manovrua për furnizimin me energji të abonentëve përmes fiderit A4 që del nga n/St Rajonal.
Për pasojë mbetën pa energji konsumatorët e zonave Rr. Bardhok Biba, Rr. Brigadave, Marteniteti Vjetër, dhe rruga “Sami Frashëri”, të cilët morën furnizim sot në orën 10:17, me përjashtim të 6 kabinave ( zona Bulevardi Zogu i pare).
Grupet e punës së avarisë në OSHEE riparuan rreth orës 12.30 të ditës së sotme, defektin e shfaqur mbrëmjen e shkuar në n./stacionin Qendër, si dhe u punua për vendosjen në punë edhe të 6 kabinave ( zona Bulevardi Zogu i parë) të cilët ishin pa energji.
Si pasojë e mbingarkesës dhe rrjetit të amortizuar gjatë paradites së sotme u dogjën 2 transformatorë që furnizojnë me energji elektrike zonën pranë Televizionit shqiptar si dhe zonën tek “Mine Peza” .
Grupet e punës së avarive të OSHEE, të cilat gjenden në terren prej mëngjesit të sotëm, kanë vënë në punë, deri në orën 13.30, të dy transformatorët duke furnizuar kështu me energji të gjithë abonentët në zonën e TVSH dhe në rrugën “Mine Peza”.
