Neli Demi, mjek psikiatër në një lidhje telefonike me News 24 ju vjen në ndihmë shqiptarëve me këshilla për të mirëmenaxhuar izilimin në shtëpi, të detyruar nga qeveria me qëllim kufizimin e përhapjes së koronavirusit.
“Është vështirë të jesh i paërgatitur për një izolim total, një ndërprerje kaq intensive e këtyre rutinave ndikon në perceptimin që kemi për ditën, për veten, për atë që po ndodh. Në këtë rast duhet të mendojmë pasojat pozitive pse po ndodh ky vetëizolim. Në rastin konkret institucionet morën masa për të ndaluar daljet në një kohë që u pa se vullnetarisht nuk po arrihej”,tha mjeku.
Në kushtet kur lira e lëvizjes është e kufizuar mjeku tha se njerëzit duhet të flasin sa më shumë me njerëzit e afërt me video apo chat. Të gatuajnë mirë, madje të bëjnë edhe yoga. Në rast se dikush ka simptoma të ankthit, duhet t’i drejtohemi mjekut dhe vetëm nën rekomandimin e tyre mund të pimë qetësues.
“Kam biseduar me pacientët e mi, me disa jam takuar, njerëzit duhet të flasin me persona që ndjehen mirë në kontakte video apo audio, nëpërmjet chateve. Në ditë të tilla kur deprivimi është mjaft i madh të mund t’i mbushim hapësirat e ditës me gjëra si gatimi, gjëra të shëndetshme, lojëra sociale. Brenda shtëpisë fokusohuni te ushqimi i mirë, yoga sic thotë edhe kryeministri, gjumi është i rëndësishëm. Të kemi parasysh që stresi dhe ankthi të mos zëvendësohet me shtim alkooli apo duhani. Është mundësi që mund ta shfrytëzojmë për të ndenjur dhe folur me njëri-tjetrin. Megjithatë nuk shmanget dot ankthi, stresi dhe konfuzioni. Dikush mund të ketë edhe ndjesi të panikut, por duhet të komunikojmë me profesionisët, ka mjekë të vetëofruar për ndihmë on line. Mendoj që në raste të problemeve që shfaqin individë të ndryshëm duhet ta ndihmojnë veten me ndonjë qetësues, patjetër ky të jetë i rekomanduar nga mjekët”, shtoi ai.
Me rëndësi tha mjeku, është fakti se duhet të përgatisim fëmijët, t’ju shpjegojmë se cfarë po ndodh dhe pse duhet të rrimë në izolim.
“Fëmijëve duhet t’ju tregojmë dhe t’ju shpjegojmë cfarë po ndodh. Studimet tregojnë se edhe 2 javë në vetëizolim tregojnë që mund të jenë problematike për njeriun. Por mbani mend se ky nuk është izolim total, dalim në ballkon, blejmë ushqime”, vijoi ai. /e.s/
