Nga Artur Ajazi
Monika Kryemadhi,akoma beson se në politikë ajo është “boshti” nga ku rrotullohen të gjithë. Madje ka arritur deri atje sa ta quajë vehten “pemë me kokrra që i gjuajnë me gurë”, nisur nga sulmet e shpeshta që shigjeton media dhe rrallë mazhoranca qeverisëse ndaj saj, lidhur me shpifjet apo dhe shpikjet gjithmonë kur dikush i prek Ilirin apo LSI. Gjithmonë kur dikush e ka vënë në “terezi” gjithçka, dhe e ka fjetur “mëndjen” se nuk e gjen gjë edhe sikur të përmbyset bota, shprehjen e parë që thotë është “unë jam pemë me kokrra, ndaj më gjuajnë”. Ndoshta kokrrat përkthehen në “para” në rastin konkret. Pra jam “njeri i pasur ndaj më sulmojnë”. Por pasuria e Monikës, nuk ka si të jetë nga “pemë me kokrra” pasi ajo është vënë padrejtësisht me forma dhe mënyra të dyshimta. Kur Monika ishte në FRESH, vite më parë, kishte ambicje të mëdha të bëhej një ditë “zonja e parë” e vendit, dhe këtë e shprehte në çdo takim. U bë në fakt “zonja e parë” kur Ilir Meta u bë kryeministër, dhe gjëja e parë që bënte ishte “vjelja e kokrrave” që prodhonte “pema” e qeverisë.
Nuk la “pemë” pa ja vjelë kokrrat, nuk la mundësi pa shfrytëzuar, nuk la ditë dhe natë të Zotit, pa i bërë yzmetin xhepave të saj. Sot Monika është një zonjë shumë e pasur, një zonjë që gëzon veç pasurisë edhe ofiqin e kryetares së një partie që lindi nga “kokrrat e vjela” të pushtetit të Ilir Metës, dhe që vazhdon ta trajtojë qenien e saj në politikë si “domosdoshmëri jetike për shqiptarët”. Duke shfletuar pjesë nga “bëmat” e dikurshme të pushtetit që ka patur në këto 2 dekada Monika dhe Iliri, gjen “xhavahire”, skandale, dhe problematika me të cilat organet e drejtësisë së re, duhet të ndaleshin me kohë. SPAK-u, duhet të hapë me urgjencë hetimin mbi pasurinë e çiftit Meta-Kryemadhi, që edhe pse erdhën nga xhaketa e dokut dhe divani 7 mijë lekësh, sot janë me pasuri marramendëse.
Monika, ti ke të drejtë ta quash vehten “pemë me kokrra”, ke të drejtë sepse deri sot,me ty nuk është marrë seriozisht Prokuroria dhe Gjykata, sepse ja ke mbyllur në çdo rast gojën me “kokrrat” e fituara padrejtësisht. Vetëm në Shqipëri, mund të ndodhë që të vish nga hiçi, të bëhesh milioner,dhe të bësh harakiri para mediave dhe shqiptarëve, sikur gjithçka e ke të trashëguar nga “stërgjyshi”. Monika, ti ke të drejtë ta quash vehten “pemë me kokrra” derisa drejtësinë e ke blerë dhe presionuar në çdo rast, kur të janë afruar fletë-thirrjet për në Prokurori. Ti ke të drejtë edhe kur tall menderen me intervistat bajate, kur thua se “vilën në Lalëz ma dinë gjithë shqiptarët”. Në një vend tjetër, ti dhe “pema” duhet të ishit me kohë në burg.E zhvatët këtë vend dhe këtë popull, dhe tani talleni dhe bëni karagjozllëqe, për të mbuluar “kokrrat” me pëllëmbët e duarve. Monika, ti duhet ta kuptosh se, vetëm në një vend si Shqipëria, ti dhe “pema” mund të shijoni të lirë si ajri, “kokrrat” e vjelura, dhe nuk janë pak, por sa të mbushësh një magazinë plot. Ti ke të drejtë Monika, edhe kur shpjegon “problemin që ka Rama me ju të LSI”, pasi e di mirë se, pas 25 Prillit 2021, ajo parti do të shkrijë si bora, dhe jo për faj të kryeministrit. Problemin realisht e ke mes Lulzimit dhe “pemës” Monika, është lufta për “kokrrat”, nuk është shaka, pasi Edi Rama ka kohë që ju ka bërë “delete” të dyve.
