Të parët që kanë vrapuar për të shuar flakët në trupin e 35-vjeçarit Saimir Zalli nga Lezha kanë qenë dy persona, një ish i burgosur politik si dhe një polic rrugor. Agim Kollçaku rrëfen për “News 24” dhe “BalkanWeb” momentet dramatike kur ai pa të riun që t’i vinte flakën vetes e më pas ashtu në flakë të lëvizte përgjatë trotuarit para Parlamentit ku dhe ju dha ndihma e parë.
Kollçaku thotë se ndodhej para Kuvendit të Shqipërisë për të protestuar si çdo të enjte bashkë me shokët e tij për mosdhënien e dëmshpërblimit për vitet e burgut politik.
“Isha tek busti, e pashë personin që ishte duke u djegur dhe u turra me vrap. Gjithë policia që ishte aty, bravo i qoftë një polici që hoqi xhaketën dhe unë bashkë me atë policin që hoqi xhaketën e shpëtova se kishte për të vdek, mori i gjithi flakë, e pastaj iku me vrap me flakë nëpër trup. Pasi e shpëtuam herën e parë u lidh me zinxhirë e donte të digjej sërish, e kishte ndarë mendjen me vdek. Mirë që e mori policia”,- tha Kollcaku.
Rastësia apo fati, e desh që ish i burgosuri politik Agim Kollçaku të ndodhej para parlamentit ku proteston çdo të enjte bashkë me shokët e tij për shkak të mos marrjes së dëmshpërblimit për vitet e burgut politik. Dosja e tij si e shumë të tjerëve qëndron e bllokuar që prej vitit 2009 në ministrinë e Drejtësisë me argumentin e dorëzimit me vonesë.
I njëjti person 5 vite më parë do të reagonte në të njëjtën mënyrë për të fikur zjarrin nga trupi i shokut të tij lirak Bejko i shpallur martir nga komuniteti i ish të përndjekurve politik./BW/a.m.
