REPORTAZH/ U nisëm për lagjen Molenbeek, që në fakt është një prej 19 komunave të cilat përbëjnë qytetin e Brukselit, i cili edhe njihet si kryeqytet jo vetëm i Mbretërisë së Belgjikës, por edhe i tërë Evropës, pasi këtu janë selitë e BE-së dhe NATO-s. Molenbeeku ndodhet vetëm 10 minuta ecje këmbë nga qendra e Brukselit. Fillon sapo të kalosh kanalin.
Kjo lagje këto ditë është bërë ndër emrat më të përfolur në botë dhe mediat nga Evropa e deri tek Amerika e Australia e kanë pasur në kryetituj. Kjo përmendje nuk është për të mirë. Emri i kësaj komune është gjendur në media për shkak të lidhjeve me sulmet terroriste, të cilat ndodhën në Paris, të premten, më 13 nëntor, ku humbën jetën 130 persona. Shumë prej atyre që kryen dhe planifikuan këto vepra kishin një lloj lodhjeje me këtë komunë, transmeton sot “Koha Ditore” shkrimin e korrespodentit nga Brukseli.
Në fakt, pothuajse nuk ka pasur ndonjë akt terrorist diku në Evropë në vitet e fundit në të cilat, në një apo tjetër mënyrë nuk është gjetur ndonjë lidhje me Belgjikën, më saktësisht me këtë komunë. Kështu Komuna e Molenbeekut ka fituar imazhin e “çerdhes evropiane të xhihadistëve“.
Sapo kaluam kanalin, pa ditur fare, pamë se pikërisht në atë rrugë kishte nisur një operacion i madh i njësiteve speciale antiterroriste. Në rrugën “Delaunoy”, afër kanalit, policia kishte nisur t’i vendoste rrethojat, ndërkohë që mblidheshin autoblinda, autoambulanca dhe vetura zjarrfikësish. Ndonëse policët nuk flisnin për “operacionin në vazhdim e sipër“ nga autoritete shpejt u konfirmua se ishin në kërkim të Saleh Abdelslamit, një prej terroristëve të dyshuar për pjesëmarrje në masakrën e Parisit, i cili ishte në ikje.
