Shefja e diplomacisë evropiane, Federica Mogherini bëri sot thirrje për një armëpushim të menjëhershëm në juglindje të Turqisë, e përfshirë në konfrontime të dhunshme midis forcave të sigurisë turke dhe rebelëve të Partisë së Punëtorëve të Kurdistanit (PKK-së).
“Bëjmë thirrje për një armëpushim të menjëhershëm në juglindje të vendit”, deklaroi Mogherini në përfundim të një takimi me udhëheqësit turq në Ankara, duke shtuar se Bashkimi Evropian dënon në mënyrë të ashpër çdo formë dhune dhe terrorizmi.
Ministri turk për Çështjet Evropiane, Volkan Bozkir është kundërpërgjigjur pas deklaratës së Mogherinit, pasi vendi i tij synon të vijojë më tej luftimet kundër rebelëve kurdë. “Turqia, si një shtet sovran, do të vazhdojë luftën kundër çdo forme të organizatave terroriste, duke përfshirë PKK-në, e cila kërcënon aktualisht sigurinë kombëtare”, u shpreh Bozkir gjatë së njëjtës konferencë shtypi.
