Një çift shqiptar është vënë në pranga nga policia italiane, pasi u kap me drogë në banesë. 36-vjeçari A.A. dhe 27-vjeçarja C.M. janë të arrestuarit në Modena, pasi iu sekuestruan 1.5 kg heroinë.
Karabinierët dyshuan për shqiptarin i cili pas një takimi me një banor, që rezultoi të ishte një nga klient arab, u largua me të shpejtë nga vendi i ngjarjes me makinën tip Mercedes Benz. Menjëherë autoritetet italiane vendosën ta bllokonin shqiptarin. Në xhepin e tij u gjet një qese me 5.4 gram heroinë, si dhe 590 euro para cash.
Pas kësaj, agjentët e policisë vendosën ta vazhdojnë operacionin e tyre edhe në shtëpinë e 36-vjeçarit. Partnerja e tij sapo vuri re prezencën e policisë, hodhi tre qese me heroinë mbi çati që arrinin sasinë 1.5 kg, shkruajnë mediat italiane.
Në brendësi të banesës u sekuestruan edhe mjetet për prerjen e drogës si dhe 5000 euro të fshehura në një kuti në dhomën e gjumit të çiftit. Për 36-vjeçarin do kryhen veprimet e mëtejshme nën akuzën e trafikut të drogës, ndërsa shqiptarja C.M u la me arrest shtëpie, duke marrë parasysh dhe faktin që ishte nënë e një fëmije 1 vjeç.
BW/d.i.
