Pas përplasjes së policisë me mjekët e spitalit “Amerikan 2” në Tiranë, Ervis Martinaj është larguar vullnetarisht në drejtim të spitalit të burgut. Në fakt ka qenë presioni i policisë së Burgjeve që ka detyruar Ervis Martinaj të largohet me dëshirën e tij, në drejtim të spitalit të Burgut. Kjo situatë rrodhi si pasojë e mjekëve të këtij spitali privat, pasi bluzat e bardha refuzonin mbrëmë rreth orës 21:00 të firmosnin kartelën dhe fletën e daljes së Ervis Martinaj nga spitali Amerikan.
Nisur nga kjo situatë, policët e kanë pasur të pamundur për të çuar deri në fund urdhrin e lëshuar nga Drejtori i Përgjithshëm i Burgjeve Stefan Çipa. Por mësohet se ky i fundit ka ushtruar presion mbi efektivat e policisë që ishin në detyrë se do bënte kallëzim penal dhe do merrte masa administrative për efektivët e policisë, nëse ata nuk do të realizonin transferimin e të arrestuarit në drejtim të spitalit të Burgut në Tiranë.
Si pasojë e vendosmërisë dhe presionit të ushtruar nga policia, vetë i arrestuari Ervis Martinaj, ka vendosur të largohet vullnetarisht, edhe pse mjekët e spitalit nuk kanë pranuar të firmosin fletë-daljen për të. Qëndrimi në spitalin privat i Ervis Martinaj, ka sjellë mobilizimin e shumë forcave të policisë së Tiranës në këtë zonë. Kjo është një situatë e paprecedentë ku mjekët e një spitali privat, pengojnë ekzekutimin e një vendimi gjyqësor që detyronte policinë e Burgjeve të transferonte Martinaj nga spitali privat në spitalin e Burgjeve në Tiranë.
Mjekët rezistuan fillimisht duke mos firmosur daljen e Martinajt nga ky spital,ndërsa policia kërkonte të ekzekutonte vendimisn e Gjykatës së Tiranës, e cila dha masën e sigurisë “arrest me burg” 30 ditor. Policia kishte në dorë një epikrizë përcjellëse të printuar me emrat e 4 mjekëve, por që nuk kishte asnjë firmë të asnjërit nga mjekët. Mjekët nuk plotësonin kartelën dhe fletën e daljes së pacientit Ervis Martinaj. Mosrealizimi i detyrës nga policët bëri që Drejtori i Përgjithshëm i Burgjeve, Stefan Çipa, të paralajmëronte masa disiplinore ndaj efektivëve dhe kallëzim penal.
Ervis Martinaj mbeti i plagosur mbremjen e së enjtes në një lokal në zonën e ish-bllokut ku nga shkëmbimi i zjarrit u vra truproja i tij, Fabjol Gaxha dhe i plagosur mbeti dhe shoku i tyre Eljo Hato. Në kërkim për ngjarjen vijon të jetë komandoja që ka qëlluar me armë zjarri, Merviol Bilo, Ervin Mata, i fejuari i Elvana Gjatës dhe Fabjol Allushi. Ndërsa në Kakavijë u arrestua dy ditë më parë Geldo Hoti i cili ka qenë në tavolinë me Matën dhe Bilon.
ma.me
