Gjaku i gjetur në fashetat e Gazmend Çollakut nuk është i Denis Shtrazës. Kjo ka qenë përgjigjia që Instituti i Mjekësisë Ligjore i ka kthyer prokurorisë së Krimeve të Rënda për ekzaminimin krahasues në lidhje me gjakun e gjetur në fashetat e përdorura për lidhjen e duarve të Gazmend Çollakut, me gjurmët e gjakut të gjetura në bagazhin e makinës ML në të cilën policia ndaloi natën e krimit për verifikim Denis Shtrazën dhe ish-shefin e antikrimit ekonomik në policinë e Tiranës, Ervin Dalipaj. Sipas ekspertizës, gjaku i mostrave të dorëzuara për ekspertim nga Prokuroria nuk është i njëjtë.
Prokuroria ka thënë se pavarësisht kësaj përgjigje, Denis Shtraza do të mbetet në burg pa afat sipas masës së vendosur ndaj tij nga gjykata pasi dyshohet se ka informacione e të dhëna në lidhje me rrëmbimin e zhdukjen e Gazmend Çollakut. Lajmi është bërë me dije nga burimet e laboratorit të IML dhe policisë shkencore. Prokuroria e Krimeve të Rënda e pyetur për këtë çështje ka thënë se ende nuk i ka mbërritur përgjigja e ekspertizës në fjalë edhe pse është në pritje të saj.
Sipas prokurorisë, analiza e gjakut në fjalë nuk është prova e vetme që ka grupi i hetimit për Denis Shtrazën dhe personat e tjerë të dyshuar në këtë ngjarje. “Jemi në pritje të rezultateve të ekspertizës nga policia shkencore”, thanë burimet zyrtare nga Prokuroria e Krimeve të Rënda.
