Konservatorët e ‘Demokracia e Re’ e Kryeministrit Kyriakos Mitsotakis mori një tjetër mandat 4-vjeçar me një rezultat të thellë që konfirmoi atë të raundit të parë të zhvilluar në 21 Maj.
Kur janë numëruar mbi 97% e votave, “Demokracia e Re” numëron 40.5% të tyre që përkthehet në 158 mandate në parlamentin me 300 vende.
Tashmë Mitsotakis mund ta bëjë i vetëm qeverinë pa pasur nevojën e një koalicioni. Në vend të dytë, por me një diferencë të madhe, 17.8% u rendit Syriza e ish-kryeministrit Alexis Tsipras që merr vetëm 47 deputetë.
Më pas vjen PASOK dhe Partia Komuniste me respektivisht 32 dhe 20 deputetë.
Pas daljes së rezultateve, Mitsotakis doli para mbështetësve ku tha se grekët i kishin dhënë një mbështetje të fortë, por ai nuk do të lejonte arrogancë në rradhët e partisë së tij duke premtuar vijimin e reformave.
Në media ka filluar të qarkullojë edhe përbërja e qeverisë së re, ku ish-ministri i Jashtëm Nikos Dendias pritet të marrë Ministrinë e Mbrojtjes.
Demokracia e Re e Mitsotakis fitoi edhe në zgjedhjet e 21 Majit, por nuk mund ta formonte e vetme qeverinë vetëm për pak deputetë. Kjo bëri që Kryeministri Mitsotakis të mos pranonte mandatin dhe ta çonte edhe një herë vendin sërish në zgjedhje.
Ligji i ri i jep partisë fituese në raundin e dytë një bonus deputetësh duke e bërë më të sigurt mandatin qeverisës. Mitsotakis ka premtuar të rrisë të ardhurat nga turizmi, të krijojë vende pune dhe të rrisë pagat pranë mesatares së Bashkimit Evropian.
/a.r
