Imazhi i Putinit dhe Macronit në Kremlin, të ulur në atë tavolinë të gjatë ovale më shumë se katër metra larg, shënoi vizitën e presidentit francez në Moskë. Disa panë në atë gjest gatishmërinë e Putinit për të poshtëruar mysafirin e tij, i cili erdhi për të mbrojtur kauzën e Ukrainës, NATO-s dhe paqes, por në realitet edhe presidenti Orban, mik i njohur i Putinit, kishte marrë të njëjtën mikpritje disa ditë më parë.
Kremlini u ofron krerëve të shteteve që vizitojnë Moskën dy mundësi: tavolinë të shkurtër, shtrëngim duarsh me Putinin dhe në përgjithësi masa të lehta për distancimin shoqëror, nëse fillimisht i nënshtroheni një testi PCR (tampon) të kryer nga mjekët rusë dhe prisni dy orët e nevojshme për rezultatin; mundësia tjetër është një tryezë e gjatë dhe masa ekstreme distancimi për të gjithë të tjerët.
Kryeministri Orban kishte pranuar testin PCR, por më pas një person nga delegacioni i tij rezultoi pozitiv dhe për këtë arsye u kalua tek tavolina e gjatë. Nga ana tjetër, presidenti i Kazakistanit, Kassym Tokaiev, ka shijuar tryezën e shkurtër, pasi bëri tamponin përkatës.
Sipas Reuters, Macron refuzoi testin PCR pjesërisht sepse duhej të kishte mbërritur në Moskë dy orë më parë, duke përmbysur axhendën e ditës, dhe pjesërisht sepse “ne e dinim shumë mirë se kjo do të thoshte mos shtrëngim duarsh dhe tavolinë të gjatë, por ne nuk mund të pranonim që rusët të merrnin ADN-në e presidentit Macron”, tha një nga bashkëpunëtorët e tij. Duhet thënë se ADN-ja mund të gjurmohet edhe në gotat apo takëmet e darkës së punës mes presidentëve, por mesa duket shoqëruesit e Macron kanë preferuar që një mostër organike e Presidentit francez, e marrë me tampon, të mos mbetej në duart e Kremlinit.
