Pretendimet e bëra për shëndetin e presidentit rus Vladimir Putin, i cili do të mbushë 70 vjeç në tetor, janë të zymta dhe makabre, si dhe të pamundura për t’u verifikuar.
Por ato ilustrojnë se sa pak dihet për shëndetin e një lideri, gjendja mjekësore e të cilit është thelbësore për të ardhmen e Evropës, aq më tepër pasi ai urdhëroi pushtimin e Ukrainës nga Rusia.
Gjatë dy dekadave në pushtet të Putinit, shumë pak është shfaqur në lidhje me shëndetin e tij, përtej imazheve të famshme të ofruara nga Kremlini që e shfaqin atë të zhveshur në një përpjekje për të projektuar një imazh të forcës.
Por interesi për shëndetin e tij është shtuar së fundmi, që pas pushtimit rus të Ukrainës.
– Cilat janë pretendimet? –
Hetimi më i thelluar për shëndetin e Putinit u publikua në prill nga faqja e lajmeve në gjuhën ruse Proekt, e cila përdori të dhëna me burim të hapur për të arritur në përfundimin se udhëtimet e presidentit në qytetin turistik jugor të Soçit ishin të sinkronizuara me ato të një numri të madh mjekësh.
Ata përfshinin specialistin e kancerit të tiroides Yevgeny Selivanov, vizitat e të cilit në Soçi shpesh përkonin me mungesat e papritura të Putinit nga sytë e publikut gjatë viteve të fundit.
Ai gjithashtu pretendoi se një nga metodat e përdorura nga Putini për të siguruar jetëgjatësinë ishin banjat me gjak të nxjerrë nga brirët e drerit në Siberi, një metodë e rekomanduar nga miku i tij Ministri i Mbrojtjes Sergei Shoigu, i cili është nga Siberia.
E përjavshmja franceze Paris Match këtë muaj tha se gjatë vizitave në Arabinë Saudite në 2019 dhe në Francë në 2017, Putini shoqërohej nga një ekip dhe sa herë që shkonte në tualet, jashtëqitja e tij merrej në mënyrë që asnjë fuqi e huaj të mos mund të analizonte mjekësisht urinën ose jashtëqitjen e tij.
Shefi i inteligjencës ushtarake të Ukrainës, gjeneralmajor Kyrylo Budanov, në një intervistë në maj për Sky Neës pretendoi pa prova se Putin ka kancer.
– Çfarë informacioni ka?
E vetmja herë kur Kremlini konfirmoi se Putini po vuante një problem shëndetësor ishte vjeshta e vitit 2012, kur ai anuloi disa takime dhe u zhduk nga jeta publike pasi u pa duke lëvizur në mënyrë të sikletshme.
Kremlini në atë kohë tha se ai kishte tërhequr një muskul dhe një gazetë shkroi se Putini e përkeqësoi një problem me shpinën.
Pandemia e Covid-19 ka parë gjithashtu sjellje ndonjëherë të çuditshme nga udhëheqësi rus, pavarësisht se Kremlini tha se ai është vaksinuar.
Çfarë thotë Kremlini?
Kremlini, nëpërmjet zëdhënësit të Putinit, Dmitry Peskov, ka mohuar me forcë të gjitha pretendimet se presidenti rus vuan nga ndonjë problem serioz shëndetësor.
Ministri i Jashtëm Sergei Lavrov në një intervistë me kanalin televiziv francez TF1 në fund të majit mohoi se Putin ishte i sëmurë, duke thënë se “Unë nuk mendoj se njerëzit e arsyeshëm mund të shohin tek ky person shenja të një lloj sëmundjeje “.
/e.d
