Nga Ilir Ikonomi
Në vitin 1922, kur në qeverinë e SHBA diskutohej për njohjen e Shqipërisë, ka patur një njeri të rrallë i cili lobonte fort në favor të shqiptarëve.
Quhej Charles Telford Erickson dhe ishte misionar amerikan me banim në Shqipëri. I njihte mirë vlerat e shqiptarëve dhe kishte besim në të ardhmen e tyre. Në një letër të datës 1 maj 1922 dërguar ambasadës amerikane në Romë, Erickson shkruante:
“Uroj që Amerika të zgjohet kundrejt faktit se Shqipëria ka disa gjëra që ia vlen t’i marrësh seriozisht. Si nga pikëpamja tregtare ashtu edhe politike, Shqipëria është çelësi i Ballkanit.
Sot, Ballkani përbën të vetmen pjesë të pazhvilluar të Evropës (nëse përjashtojmë Rusinë) dhe është një fushë e pasur për investime. Hyrja për në Ballkan me siguri që herët a vonë do të jetë përmes Shqipërisë dhe Adriatikut, dhe jo rrugës së gjatë të Egjeut.
Një shprehje e vogël miqësie nga ana e qeverisë dhe popullit amerikan do të kishte efekt të madh te shqiptarët. Ata janë një popull krenar që e mendojnë veten po aq të mirë sa çdo popull tjetër.
Edhe nëse janë të varfër, ata nuk kërkojnë favore. Ata nuk janë reklamues të mirë të vetvetes madje nuk kanë mundur as t’i kundërvihen propagandës dhe gënjeshtrave që vazhdimisht qarkullojnë kaq gjerësisht kundër tyre.
Por ata janë mjaft besnikë ndaj miqve dhe të aftë të tregojnë mirënjohje për të mirat që u bëhen.”
Ne e nënvlerësojmë dhe e shajmë veten. Ka të tjerë që na duan dhe na vlerësojnë, si ky amerikan i shquar!
