Përmes një spektakli fishekzjarresh dhe urimeve të shkëmbyera më parë, shqiptarët i kanë dhënë mirëseardhjen Vitit të Ri 2020.
Mijëra qytetarë u janë drejtuar shesheve qëndrore pas mesnate, për të festuar orët e para të ndërrimit të viteve.
Në Tiranë, festimet në shesh kanë nisur më herët përmes koncertit të organizuar nga Bashkia.
Emrat e njohur si Eneda Tarifa, Mariza Ikonomi dhe Elhaida Dani kanë qenë protagonistët e një koncerti të nisur që në orën 23:00 në sheshin “Skënderbej”.
Ndërkohë mësohet se qindra forca policore, zjarrfikës dhe mjekë të spitaleve rajonale janë në gadishmëri për të siguruar mbarëvajtjen e festimeve.
Më herët, zyrtarë të lartë të Policisë së Shtetit bënë apel për shmangien e alkoolit nga drejtuesit e mjeteve.
Në planin e masave për çdo qytet është përfshirë mbajtja nën kontroll e situatës në veçanti në sheshe publike dhe pranë restoranteve të cilat kanë organizuar aktivitete të ndryshme gjatë festës.
Burime zyrtare raportojnë se fatmirësisht nuk është shënuar asnjë incident serioz gjatë mbrëmjes së ndërrimit të viteve.
JavaNews.al i uron të gjithë shqiptarët për një vit të begatë, me shëndet dhe lumturi në çdo vatër familjare.
