Kryeministri Edi Rama ka reaguar sërish për situatën tragjike të krijuar nga tërmeti shkatërrues, që deri më tani ka shkaktuar 21 viktima dhe mbi 600 të plagosur. Teksa publikon pamje nga operacionet e grupeve të shpëtimit në terren, kreu i Qeverisë përmes një postimi në “Facebook” shpreh mirënjohje për “heronjtë e kësaj dite të paharrueshme dhimbjeje kombëtare”.
“MIRËNJOHJE PËR HERONJTË e kësaj dite të paharrueshme dhimbjeje kombëtare, njerëzit e zakonshëm që shërbejnë nën uniformën e Policisë së Shtetit, të Forcave të Armatosura, të Urgjencës Kombëtare Shëndetësore, të Zjarrfikëseve; Bluzat e Bardha, që aq rëndom i përgojojmë si s’ka më keq në ditët me diell dhe që prej orësh të gjata po shpëtojnë jetë e po kurojnë plagë të rënda; Trupat Speciale të Kosovës, të cilat u bënë sot shembëlltyra heroike e bashkimit në dhimbje e në sakrificë të kombit tonë; forcat e njerëzore të solidaritet, ardhur me një frymë nga vendet mike, që vazhdojnë të zbarkojnë edhe tani në aeroportin e Rinasit, për të bashkuar fuqinë e eksperiencës e të solidaritetit të tyre, në një betejë këmbëngulëse e cfilitëse, në kërkim të jetës që ende merr frymë nën gërmadhat e natës më të keqe që kemi kaluar si popull prej kushedi se sa vitesh…”, shkruan kryeministri Rama. /e.s/
