Në muajin e ndërgjegjësimit të luftës ndaj kancerit të gjirit, Ministria e Shëndetësisë do të ofrojë mamografi falas në gjashtë ditë të javës, përveç së dielës. Lajmin e mirë e dha ministrja e Shëndetësisë dhe Mbrojtjes Sociale, Ogerta Manastirliu, nga Poliklinika e Specialiteteve Nr.3, në çelje të fushatës ndërgjegjësuese për të gjitha gratë.
“Vetëm gjatë vitit të fundit, ne kemi dyfishuar shërbimin e ma- mografisë, duke ofruar për herë të parë këtë shërbim në Dibër, Kukës dhe Gjirokastër si dhe nëpërmjet mamografëve të lëvizshëm, shërbimi ofrohet falas në të gjithë vendin”, theksoi ministrja me një thirrje për gratë që të mos e neglizhojnë kontrollin, pasi diagnostikimi i hershëm shpëton jetë. Vetëm nëpërmjet mamografëve të lëvizshëm, kryhet ekzaminimi i gjirit falas për rreth 5500 gra në vit.
Përgjatë gjithë muajit, shërbimi i mamografisë do të jetë pa pagesë dhe do të ofrohet nga ora 08:00-18:00, nga e hëna në të premte, dhe 08:00-14:00 të shtunave në Poliklinikën e Specialiteteve Nr. 3 në Tiranë, në Maternitetin “Mbretëresha Gerladinë”, në QSUT si dhe në 9 spitale rajonale ku ofrohet ky shërbim.
Ministria e Shëndetësisë dhe Mbrojtjes Sociale ka shpallur edhe kalendarin e mamografëve të lëvizshëm, të cilët do të jenë përgjatë muajit tetor në Skrapar, Fier, Ersekë, Sarandë, Lezhë, Fier, Burrel, Bajram Curri, Fierzë dhe Bulqizë.
Kanceri i gjirit është kanceri më i shpeshtë te gratë në Shqipëri dhe rastet e reja të raportuara vijojnë të rriten çdo vit.
ma.me
