Potencialet për investime dhe zhvillim në qytetin e Vlorës u diskutuan përmes një forumi ekonomik të mbajtur këtë të shtunë, ku i pranishëm ishte edhe Kryeministri Edi Rama.
Në takim ishte e pranishme edhe ministrja e Zhvillimit Ekonomik, Turizmit, Tregtisë dhe Sipërmarrjes, Milva Ekonomi, si dhe drejtori i GIZ Hans Jurgen Cassens, e përfaqësues të pushtetit lokal.
Ministrja Ekonomi vuri në dukje se ekonomia kombëtare po rritet. Sipas saj, në vitin e parë të kësaj qeverisjeje u dyfishua rritja ekonomike. “Në vitin që jemi po përpiqemi fort ta trefishojmë atë. Kjo dëshmon se po ecim të sigurtë në rrugën e konsolidimit ekonomik, i cili për t’u shumëfishuar ka nevojë për energjizim të të gjitha burimeve të mundshme dhe ulje të informalitetit. Krahas rritjes ekonomike është përmirësuar konsolidimi fiskal, duke reduktuar gradualisht defiçitin buxhetor dhe borxhin publik. Kemi arritje premtuese edhe në luftën ndaj ekonomisë informale”, deklaroi Ekonomi.
Ajo shtoi se burimet ekonomike tradicionale të rritjes, të cilat nuk gjenerojnë me zhvillim, gradualisht po i zëvendësojmë me burime të reja të qendrueshme dhe afatgjata. Ekonomi informoi se po punohet për stimulimin e sektorëve prioritarë si turizmi, bujqësia, manifaktura, energjia etj. “Eshtë hartuar një legjislacion favorizues për investime në këta sektorë dhe në mënyrë sistematike po punohet për ta lehtësuar atë.
Shqipëria ofron një mjedis të favorshme dhe kosto të përshatshme për të bërë biznes, skema stimuluese tërheqëse për investitorët, sistem online për regjistrimin dhe pagesat e taksave si dhe një proces one stop shop për regjistrimin dhe licensimin e bizneseve”, deklaroi Ekonomi.
Qeveria, tha ajo, ka lançuar reforma thelbësore drejt një qasjeje të re me biznesin. Legjislacioni është përmirësur në një sërë sektorësh. Po ashtu, sipas saj, qeveria ka lehtësuar procedurat e eksportit duke implementuar një sistem elektronik inspektimi, orientuar në vlerësimin e riskut, i cili ka reduktuar kohën për procedurat kufitare. Shqipëria ofron mundësi të mëdha investimi në sektorë me rritje të qëndrueshme ekonomike si energjia dhe industria minerare, transporti dhe logjistika, turizmi, bujqësia dhe manifaktura.
Ekonomi vuri në dukje edhe punën e bërë për thjeshtimin e procedurave administrative për realizimin e projekteve të investimit. Aktualisht në Shqipëri, tha Ekonomi, pjesa më e madhe e popullsisë është përqendruar në zonën urbane 57, 2 % dhe nga kjo tendencë nuk bën përjashtim as rajoni i Vlorës ku popullsia urbane zë 69%. Një qytet i populluar nxit edhe zhvillimin e zonave rurale përreth tij.
“Potencialet e qytetit të Vlorës lidhen padyshim me pozicionin gjeografik, portin, burimet natyrore si naftë, gaz natyror, bitum dhe kripë dhe forcën punëtorë të kualifikuar. Burimet natyrore krijojnë mundësi për të zhvilluar degë të tilla si industri nxjerrëse dhe përpunuese, peshkim, bujqësi, blegtori, manifakturë, tekstile, ndërtim, turizëm si dhe potencial të lartë për zhvillim të energjisë së rinovueshme”, theksoi Ekonomi.
Ministrja Ekonomi, renditi disa nga investimet në qytetin e Vlorës si ai i by pass-it të Vlorës, financuar nga BEI, BERZH dhe BE në vlerën 53 milionë euro, i cili parashikohet të përfundojë brenda vitit 2017, dhe pritet t’i japë frymëmarrje të gjithë zonës së Vlorës, ndërtimi dhe rikonstruksioni i rrugës së lumit të Vlorës, financuar nga fondi kuvajtian me 41 milionë dollarë apo përfundimi i projektit parashikohet të shkojë në vlerën 78 milionë dollarë.
Ndër të tjera, Ekonomi renditi planin e investimeve për bregdetin e jugut, i përgatitur nga FSHZH, përmes së cilit parashikohen 123 projekte në infrastrukturë që arrijnë në vlerën 30 milionë dollarë, ndërtimin e fazës së I dhe II dhe pjesërisht të III të portit të Vlorës, i cili financohet nga qeveria italiane në vlerën 14,3 milionë euro, si dhe furnizimi me ujë dhe saniteti në Orikum, përmes një projekti që kap vlerën 16,4 milionë dollarë, nga të cilat IDB financon 13,3 milionë dollarë qeveria shqiptare 3,1 milionë dollarë.
MZHETTS për vitin 2016 ka planifikuar një fond prej 163,7 milionë lekësh, me të cilat do të mbështeten një numër projektesh mbi krijimin e infrastrukturave turistike. “Eshtë dizenjuar dhe plotësuar zona e teknologjisë dhe zhvillimit ekonomik TEDA Vlorë. TEDA Vlora ka një vend strategjik, 151 km larg nga kryeqyteti Tirana, është pjesë e korridorit 8 dhe ngjitur me autostradën adriatiko-joniane.
Ajo ka shkëmbim të drejtpërdrejtë me SH8 Highway për 4.6 km larg. Tirana International Airport “Nënë Tereza” është vetëm 147 km larg nga TEDA Vlorë dhe është i përshtatshëm për transportin e mallrave dhe udhëtarëve. Ekziston një infrastrukturë hekurudhore që kalon përmes zonës TEDA Vlora ka qasje në Portin e Durrësit (120 km larg) dhe Portin e Vlorës (5.7 km), dy portet më të mëdha në Shqipëri”, tha Ekonomi.
