Ministrja e Financave dhe Ekonomisë, znj. Anila Denaj, u shpreh optimiste lidhur me likujditetin e financave të shtetit shqiptar. Gjatë një interviste për analistin Lorenc Vangjeli në emisionin “Java në RTSH”, Ministrja Denaj iu përgjigj pyetjeve lidhur me mjaftueshmërinë e likujditeteve të shtetit për të përballuar situatën e krijuar si pasojë e pandemisë COVID-2019, sidomos nëse kjo e fundit do të zgjasë akoma e më shumë.
Ministrja Denaj iu referua daljeve të fundit të qeverisë në tregun e brendshëm me bono thesari dhe tha, se ato rezultuan të suksesshme, pasi tregu i brendshëm iu përgjigj pozitivisht kërkesës së qeverisë për likujditet.
“Daljet e fundit në tregun e brendshëm, në atë që quhen bono thesari, qoftë në lekë, qoftë në euro, na treguan që të gjitha ankandet që patëm në dy javët e fundit ishin të suksesshme. Në ankandin që ndodhi në euro, ku ne kërkuam 100-120 milionë euro, në fakt u ofruan 160 milionë euro dhe ne zgjodhëm 100 milionë euro” u shpreh znj. Denaj.
Ministrja theksoi se parashikimet lidhur me likuiditetin nuk lidhen me një muaj, por me gjithë vitin dhe disa plane për të cilat qeveria kishte avancuar më përpara, një prej të cilëve lidhet me daljen e qeverisë në tregjet ndërkombëtare të huamarrjes në maj, Eurobondi.
“Ne mundet ta shikojmë nëse tregjet ndërkombëtare do të jenë të tilla që nuk na lejojnë në dalim, që të marrim një goditje dhe në kosto, ne do të shtynim pak dhe kjo do të na krijonte një hapësirë tjetër. Por në aspekt likuiditeti, e thashë edhe një herë, argumenti është shumë i rëndësishëm. Tregu jonë i brendshëm lejon. E para, ne kishim dhe kemi rezervat tona, të cilat në aspekt likuiditeti ishin parashikuar si shpenzime buxhetore të çdo muaji. Ndërkohë, tregu financiar bankar është një treg jo vetëm solid nga ana e stabilitetit, të treguesve të tij financiarë, por dhe likuid”, u shpreh Ministrja.
Kjo deklaratë nga Znj. Denaj vjen edhe në vijim të aprovimit nga FMN të mbështetjes financiare emergjente për të adresuar nevojën e bilancit të pagesave, në vlerën e 190.5 milionë dollarë (174 milionë euro) si ndihmë financiare në kuadër të Instrumentit të Shpejtë të Financimit (RFI).
Me këtë financim FMN ka treguar gatishmërinë për të ndihmuar Shqipërinë të luftojë pandeminë dhe për të ndihmuar rimëkëmbjen ekonomike.
