Ministria e Bujqësisë dhe Zhvillimit Rural ka sqaruar për median dhe mbarë opinion publik mënyrën se si dhe ku do të kryhen analizat e produkteve ushqimore.
Reagimi i ministrisë erdhi pas fjalëve se bërja e analizave do jepej me koncension. Ministria sqaron se nuk bëhet fjalë për asnjë kontratë të partneritetit publik privat (Koncension) dhe as për shmangie të labaroatorëve të AKU-së apo të ISUV-it si laborator reference.
Reagimi i plotë i ministrisë
Ministria e Bujqësisë dhe Zhvillimit Rural ka ndjekur së fundi raportimet në media mbi Urdhërin e Ministrit, Nr.524. datë 23.09.2019, që autorizon “Noval Laboratory” për kryerjen e analizave laboratorike të mostrave të marra gjatë kontrollit zyrtar dhe tipin e analizave që është i autorizuar të kryejë.
Nisur nga këto raportime, shpesh të nxituara dhe me argumente sipërfaqësore, sqarojmë opinionin publik, se nuk bëhet fjalë për asnjë kontratë të partneritetit publik privat (Koncension) dhe as për shmangie të labaroatorëve të AKU-së apo të ISUV-it si laborator reference.
Që prej vitit 2008, ligji për ushqimin (neni 44 dhe neni 59) lejon Ministrat e Bujqësisë për të autorizuar laboratore privat. Fatkeqesisht nga 2008 nuk ka pasur asnjë laborator privat që të kishte kapacitetet e kërkuara. Vetëm këtë vit (2019) është kryer një investim serioz prej miliona eurosh në një laborator privat, i cili ka kapacitetet e duhura sipas ligjit dhe akreditim 3-vjeçar. Në këtë kontekst MBZHR i konsideron shumë të rëndesishme të gjitha ato investime, qofshin publike apo private, që kontribuojnë në rritjen e kapaciteteve laboratorike në vend pasi kështu rritet siguria ushqimore dhe mbrohet shëndeti i konsumatorit.
Nuk është e vërtetë sikundër pretendohet në disa raportime të mediave, se janë mbyllur apo “shuar” aktivitetet e laboratorëve të AKU-së apo ISUV-it. Ky i fundit vijon të mbetet laborator reference dhe kushdo nga operatorët e biznesit ushqimor mund të shkojë për të kryer analiza.
Ministria e Bujqësisë dhe Zhvillimit Rural e konsideron autorizimin për laboratorët privat si pjesë komplementare të aktivtetit të AKU-së. Fakti që po autoriziohet edhe një laborator privat për kryerjen e analizave nuk do të thotë se janë të përjashtuar laboratorët e tjerë të AKU-së apo ISUV-it. Ky shërbim është PLOTËSUES për operatorët e biznesit ushqimor, JO DETYRUES.
Deri më tani AKU dhe ISUV kanë përdorur edhe laboratorë të akredituar në vende jashtë Shqipërisë për analiza të caktuara. Ka një praktikë të konsoliduar për këtë çështje, por së fundi janë krijuar kushtet për t’u kryer edhe brenda vendit. Operatorët e biznesit ushqimor për analizat e autokontrollit mund t’i drejtohen cilitdo laboratorë që dëshirojnë kundrejt tarifave të përcaktuara.
Në strategjinë e saj MBZHR synon të vazhdojë të investojë me fondet e buxhetit të shtetit apo të donatorëve të huaj në kapacitetet laboratorike të AKU dhe ISUV. Këtu përmendim investimin e bërë së fundmi nga BE në pajisjet laboratorike me një shumë prej 2,2 mln Euro. Përmirësimi dhe rritja e kapaciteteve të laboratorëve shtetërore do të vijojë. /l.m
