Ministri i Mbrojtjes Pirro Vengu është takuar në Bruksel me sekretarin e Mbrojtjes së SHBA,-së Pete Hegseth. Në njoftimin e shpërndarë nga zyra e shtypit e Ministrisë së mbrojtjes thuhet se ministri Vengu dhe sekretari Hegseth ranë dakord për vijimin e ndërveprimit në nivelet më të larta për objektiva të përbashkëta.
Gjatë ministerialit të NATO-s, ministri Vengu zhvilloi disa takime me homologët nga SHBA, Franca, Italia, Kroacia dhe Hungaria. Në fokus të bisedave ishte forcimi i bashkëpunimit ushtarak, vëmendja strategjike për rajonin tonë dhe çuarja përpara e projekteve të përbashkëta në Industrinë e Mbrojtjes dhe modernizimin e Forcave të Armatosura.
Vengu u përshëndet gjithashtu me sekretarin e Përgjithshëm të NATO Mark Rutte, të cilin e vlerësoi për lidershipin e tij në drejtimin e Aleancës Euro-Atlantike në këto kohë sfiduese.
Në bisedën me ministrin e Mbrojtjes së Francës Sébastien Lecornu bashkërenduan disa hapa në funksion të modernizimit të Forcave të Armatosura, me synim konkretizimin e projekteve në kohë sa më të shpejtë.
Në takimin me zëvendëskryeministrin dhe ministrin kroat Ivan Anušić ranë dakord për të forcuar më tej marrëdhëniet, me fokus të veçantë bashkëpunimin në Kosovë dhe sigurinë në rajonin Adriatik-Jonian. Ministri Vengu e ftoi kolegun kroat për një vizitë në Tiranë.
Me ministrin italian të Mbrojtjes Guido Crosetto, ministri Vengu diskutoi mbi avancimin e projekteve për transformimin e kapaciteteve tona në tokë, ajër dhe det.
“I bindur që shumë shpejt do kemi një sërë rezultatesh cilësore me impakt në hapësirën detare. Me kolegët italianë konvergojmë gjithashtu në rritjen e stërvitjeve, trajnimeve, edukimit”, u shpreh ministri i Mbrojtjes”, thuhet në njoftimin e Ministrisë.
Gjatë bisedës me homologun hungarez, Kristof Szalay-Bobrovniczky, u trajtua mundësia për forcimin e bashkëpunimit në Industrinë e Mbrojtjes, edukimin në fushën e mjekësisë dhe shkëmbimin e eksperiencave në siguri dhe mbrojtje.
