Në Gjykatën e Krimeve të Rënda ka nisur seanca e radhës ndaj 9 imamëve të vetëshpallur të cilët akuzohen për rekrutimin e xhihadistëve për të luftuar në Siri. Ndryshe nga seancat e tjera, këtë të martë masat e policisë janë të shtuara. Agjentë anti-terror dhe efektivë të policisë janë të pranishëm në sallë për të shmangur çdo incident të mundshëm.
‘Shqiptarja.com’ shkruan se gazetarët janë lejuar të ndjekin seancën vetëm pak minuta në nisje të saj, ku një nga të pandehurit Fadil Myslimani, ka bërë një deklaratë të fortë. Ai tha se ministri i Punëve të Brendshme Saimir Tahiri nuk ka arsye pse të frikësohet, por nëse ka bërë gjë kundër myslimanëve atëherë po që duhet të ketë frikë.
‘Kjo është seanca e parë që mbahet që pas sulmeve terroriste të 13 nëntorit në Paris dhe pas kërcënimeve që ju kanosën disa vendeve të Evropës për sulme të tjera nga ISIS. Edhe Shqipëria ka shtuar masat në institucionet e rëndësisë së veçantë dhe hapësira publike ku ka më shumë lëvizje, për të garantuar sigurinë’ – raporton Shqiptarja.com.
