Ministri i Drejtësisë, Ylli Manjani duke folur për amnistinë e fund vitit përpara Komisionit të Sigurisë, ka sqaruar se cila është kategoria që nuk përfiton falje nga dënimi. Manjani u kujdes të sqaronte se, asnjë zyrtarë publik nuk përfiton nga amnistia. Kjo rrëzon hamendësimet që janë publikuar kohët e fundit se nga amnistia mund të përfitojë dhe deputeti Armando Prenga.
“Nuk amnistojmë zyrtarët publikë. Nuk amnistojmë kultivuesit e lëndëve narkotike. Nuk amnistojmë dhunuesit e grave. Nuk amnistojmë të miturit recitivist. Amnistia është një akt kolektiv dhe jo individual. Nëse dëshironi që mos dalë dikush nga burgu atëherë ndaleni këtë nismë. Do amnistojmë vetëm kundërvajtjet penale jo krimet. Kush është dënuar me 2 vite e një ditë ka bërë krim dhe jo kundërvajtje”, deklaroi Manjani.
Ndryshon amnistia, Manjani: Lirohen vetëm 670 të dënuar. PS kundër
Partia Socialiste do të kërkojë sot ndryshime në projektligjin e “Amnistisë”, të propozuar nga Ministria e Drejtësisë gjatë mbledhjes së Komisionit të Ligjeve. Dje, deputetët e PS-së në Komisionin e Ligjeve janë shprehur të pakënaqur me draftin e propozuar nga ministri i Drejtësisë, Ylli Manjani, duke aluduar se propozimi nuk vjen në një linjë me amnistinë e fundit të miratuar në vitin 2014.
Burime nga Grupi i PS-së bënë të ditur se drafti i propozuar nga Manjani ka ngushtim të numrit të përfituesve, çka ka bërë që disa prej politikanëve që janë në proces hetimor apo gjykim, të mbeten jashtë amnistisë. Socialistët do të kërkojnë që të zgjerohet numri i përfituesve nga amnistia gjatë shqyrtimit të ligjit në Parlament.
“Duke e gjykuar me amnistinë e fundit të vitit 2014, ka një shtrëngim të kritereve ndaluese të përfitimit të amnistisë dhe duke bërë një tabelë krahasuese të veprave penale që janë shtuar në nen, sigurisht është rritur neni i veprave penale që i nënshtrohen neneve ndaluese, pra që nuk përfitojnë nga amnistia”, tha dje relatori i PS-së, Ulsi Manja.
Më tej, relatori i projektligjit tha dje se: “E reja e kësaj amnistie në raport me amnistinë e fundit është se nuk do të kemi vetëm amnisti të dënimit, por edhe amnisti të ndjekjes penale. Kjo amnisti shtrihet dhe mbi ndjekjen penale, që do të thotë: jo vetëm që do të kemi shuarje të dënimit për ata persona të cilët janë dënuar deri në 2 vjet apo u ka mbetur edhe 2 vjet burgim. Por, edhe për këtë kategori personash do të pushohen dhe ndjekjet penale në çdo fazë të hetimit apo gjykimit që ato janë. Në këtë pikëpamje, duhet të themi që është amnisti e plotë. Nga shifrat që ministri raporton për përfituesit, më duket një shifër shumë e ngushtë”.
Ndërkohë që ministri Manjani tha se asnjë nga zyrtarët publikë në hetim nuk do të përfitojë nga amnistia.
“Shqetësimet që ka ngritur publikisht PD nuk qëndrojnë në amnistinë që ne kemi propozuar. Nuk përfiton askush nga ata të asaj kategorie, zyrtarë publikë apo ata që janë dënuar për zgjedhjet apo gjëra të kësaj natyre. Nëse ka burrë nëne me e gjet se ku është prapavija politike nga lirimi i 670 vetëve, është e vështirë ta gjykojmë apo paragjykojmë”, tha Manjani. Konkretisht bëhet fjalë për deputetin Armando Prenga dhe kryebashkiakun e Kavajës, Elvis Rroshin, të cilët sipas draftit të amnistisë nuk përfitojnë lirim dhe pushim të çështjeve.
Ajo që ra dje në sy ishte një përplasje mes juristësh gjatë mbledhjes së Komisionit të Ligjeve, teksa Fatmir Xhafaj iu drejtua ministrit Manjani duke i thënë se propozimi për amnistinë ka ndryshuar rrugës.
“Amnistia është një nismë parlamentare dhe natyrisht amnistia është atribut i Parlamentit, është një projektligj që jo rastësisht kushtetutëbërësi ia ka caktuar të jetë një ligj i përforcuar me shumicë të cilësuar për shkak se ky duhet të jetë një vullnet sa më i gjithëpranuar, jo vetëm për forcat politike, për opinionin publik dhe për qytetarët që ata përfaqësojnë. Ne i jemi drejtuar Prokurorisë së Përgjithshme që të japë një koment, besoj se duhet ta ketë marrë Ministria e Drejtësisë një koment nga ana e tyre. Por duke parë disa praktika të mëparshme, kur mund të jetë ndryshuar amnistia edhe rrugës, është e domosdoshme për një opinion të fundit”, u shpreh dje Xhafaj.
KUSH PËRFITON NGA AMNISTIA E 2016
670 të burgosur do të lirohen nga amnistia e vitit 2016
Nga këta përfitojnë
15 gra të dënuara nga 94 që janë në total
7 burra të moshuar mbi 60 vjeç
8 të mitur të burgosur përfitojnë
15 të burgosur të sëmurë në fazë terminale
ma.me
